CC OO denuncia un parón nel procesu d’implantación de la Llingua Asturiana n’Educación Infantil

La previsión de plantiya pal cursu viniente nun contempla les hores de Llingua Asturiana n’Infantil, “poniendo en peligru’l caltenimientu de los grupos onde se ta dando de forma esperimental”, afirma Comisiones Obreres (CC OO). El sindicatu acusa a la conseyería de provocar un parón na implantación del idioma nesta etapa.

Según apunta nun comunicáu, esta situación contradiz les pallabres del conseyeru Genaro Alonso d’hai más d’un añu de camudar el Decretu curricular d’Educación Infantil pa inxertar dellos conteníos d’asturianu nesta etapa, siendo ún de los oxetivo d’esti decretu, que se fixo públicu en payares del 2017, “d’acordies col direutor xeneral de Planificación Llingüística, Fernando Padilla, regular les enseñances d’asturianu nos centros onde yá se tán dando de forma esperimental”.

Sicasí, esto nun se ta dando, y el Sindicatu d’Enseñanza CC OO Asturies pon l’exemplu del centru públicu uvieín La Gesta. Nel mesmu, “onde les cifres d’alumnáu que recibe clases de Llingua Asturiana nun pararon d’aumentar nos últimos cursos, la dotación prevista pola Alministración ye de media plaza, en cuenta de la plaza completa con que contaba’l colexu esti cursu”.

“La previsión de plantíes faise enantes de que l’alumnáu formalice la matrícula, espresando asina’l so determín de recibir o non enseñances d’asturianu. Nesti sen, son frecuentes les quexes del profesoráu de Llingua Asturiana, que tolos años s’atopa con que la previsión estimada en munchos centros ta per baxo de la matrícula real. En too casu, resulta incomprensible que la Conseyería d’Educación nun compute les hores de les esperiencies pedagóxiques que yá tán en marcha col alumnáu de 5 años”, continúa’l comunicáu.

Poro, CC OO esixe’l cumplimientu de la Llei d’Usu y Promoción del Bable/Asturianu y que se xeneralice “la ufierta voluntaria de conteníos d’asturianu y gallego-asturiano nel segundu ciclu d’Educación Infantil”.