Cayo Lara ve bien la candidatura de Llamazares al Congresu por Asturies

El coordinador estatal d’IX, Cayo Lara, señaló esti llunes que ve bien que Gaspar Llamazares encabece la candidatura de la coalición por Asturies a les elleiciones del 20-P. Sicasí, señala que la decisión última ye de los órganos del partíu.
 
Jesús Iglesias, coordinador d'Izquierda Xunida (IX) n’Asturies, señaló güei n’Uviéu, a entrugues de la prensa, que falara per telefónu con Lara por si “había dalguna torga” pa que Llamazares, candidatu a la presidencia del Estáu de la coalición nes xenerales del 2008, se presente por Asturies, como dixo'l diputáu que desea facer. Ante lo que calificó como una lluz verde de la coalición, Iglesias señaló que diba treslladar a la Executiva asturiana la propuesta de que Llamazares encabece la candidatura pal próximu 20 de payares. “Gaspar ye ún de los valores más importantes d'IX; la so esperiencia y la so vinculación a Asturies tórnenlu nel meyor candidatu pa qu'Asturies recupere'l so diputáu por IX”, destacó.
 
Según el coordinador de la coalición nel país, Lara díxo-y nesa conversación que consideraba “imprescindible” que Llamazares fora diputáu y que formara parte del grupu parllamentariu d'IX tres les eleiciones. “Y qu'a partir d'esa premisa, los territorios y la voluntá de Gaspar yera la que tenía que determinar por ónde presentase a les eleiciones”, acabó Iglesias. Sicasí, Lara quixo puntualizar güei les sos pallabres y aseguró qu’él nun dio “nenguna lluz verde” a la candidatura de Llamazares a les xenerales como cabeza de llista por Asturies, sinón que manifestó una “opinión” cuando entrugó-y Iglesias, yá que considera que’l diputáu ye “un bon parllamentariu”.
 
Al respeuto, el coordinador estatal d’IX señaló que “nun ye una decisión que me compete, sinón los órganos de decisión y direición. L’ámbitu de competencies nel casu asturianu, como nel restu de les comunidaes, ye de las federaciones autonómiques, que tien que tar en corresponsabilidá cola decisión de los órganos federales d’IX”, esplicó.