Cayarga lleva per tercer vegada'l Teodoro Cuesta

Col poemariu 'Mazanes d'iviernu'.

El XXIX Premiu Teodoro Cuesta de Poesía, qu'entama'l Conceyu de Mieres, foi pa Xabiero Cayarga. L'escritor cangués lleva asina esti premiu, el más prestixosu d'esti xéneru lliterariu xunto col Xuan María Acebal qu'entrega'l Gobiernu dientro los sos Premios Lliterarios –ganólu nel 2005 con 'Les llingües de la hidra'–, per tercer ocasión.

La primera foi nel 2000 con 'Pequeña Europa', repitiendo nel 2010 col reconocíu 'La ñeve del cuquiellu'. Tamién con diez años de diferencia llega agora un Teodoro Cuesta nuevu pa Cayarga, que presentó'l poemariu 'Mazanes d'iviernu' nesta ocasión.

El xuráu formáu por Xuan Bello, Esther Prieto, Pablo Rodríguez Medina, Laura Marcos y Daniel Blanco, con Ana Belén Alonso Losa, conceyala de Normalización Llingüística, como presidenta y Ismael González Arias como secretariu, ensin voz nin votu dambos, decidióse por unanimidá pola obra del autor residente n'Alemaña ente los 26 presentaos. L'aconceyamientu tuvo llugar n'avientu del 2020 de manera telemática.

La recompensa pa Cayarga por esti gallardón lliterariu son 4.000 euros. Amás, l'autor ha de comprometese a participar nun alcuentru colos participantes del Club de Llectura del Atenéu de Turón y a presentar el llibru na Casa Cultura Teodoro Cuesta.

Cayarga asocede nel palmarés del premiu a Vanessa Gutiérrez, ganadora nel 2018 con 'Refraneru popular' –nel 2019 nun se convocó–.

Na imaxe, Cayarga nuna entrevista pa TPA.