Caxastur entra na mayor empresa d'alquiler de maquinaria

La Caxa d´Aforros d´Asturies, xunta la primer compañía de capital riesgu del Estáu, Dinamia, van controlar l'accionariáu de la empresa General de Alquiler de Maquinaria (GMA), compañía líder nel sector d´alquiler d´equipos industriales. Dinamia Capital Privado y el fondu d´inversión priváu Nmás1 Private Equity Found ficiéronse col 80,6% del capital social de la compañía d´alquiler de maquinaria, mentantu Caxastur y l'equipu directivu de GMA van controlar el 19,4% restante del capital. L´oxetivu ye liderar el procesu de concentración nel esgayáu sector d´alquiler de maquinaria a curtiu y llargu plazu pa la construcción y la industria. Liderar l'alquiler de maquinaria con o ensin operariu ye´l oxetivu final que quieren algamar los nuevos propietarios. Les perspectives de facturación de les tres empreses qu'agora componen GAM ye de 55 millones d´euros nesti añu 2003.

GAM t´acabante de mercar la empresa andaluza Talleres Cabrera, la vasca Aidaiturriaga y l´asturiana Alquiloviedo, histórica empresa que pierde la so identidá y va ver como se treslladen a fuera d'Asturies los sos centros de decisión. Con estes tres nueves compañíes la empresa avanza nos sos oxetivos de tener presencia en tolos territorios del Estáu.

Caxastur continúa cola so política d'inversiones estratéxiques n'empreses, una política considerada errática por dellos analistes y que ta llevando les actividaes de la caxa asturiana a aventures bien lloñe d´Asturies. Ello ye que Caxastur nun va tener nengún tipu de control na sociedá GMA, ya que solo tien el 10% del capital social de la compañía d´alquiler.