Catecismu n’asturianu

El Colectivu Manuel Fernández de Castro presentó la selmana pasada en Seminariu d'Uviéu, el que ya ye'l tercer catecismu escritu n'asturianu, basáu nel "doctrinariu" de la Conferencia Episcopal española de 1995. El catecismu, tituláu "Tercer Catecismu de la Comunidá Cristiana: Esta ye la nuesa fe; esta ye la fe de la Ilesia amás de tar escritu na nuestra llingua fai delles adaptaciones a la realidá asturiana, con referencies directes.
El Colectivu Manuel Fernández de Castro ye una agrupación de cristianos (seglares y relixosos) que fai por esparder l'usu del asturianu na comunidá cristiana, iguando testos que van dende homilíes a traducciones bíbliques y que cumple 15 años de vida xustamente agora.
El presidente del Colectivu, Federico Fierro, señaló qu'ente les referencies a Asturies ta'l Camín de Santiago o la devoción a la Santina, al mesmu tiempu que calificó'l catecismu como pensáu pa xente adulto y neños mayores de 10 años, con dellos niveles de llectura. Fierro sulliñó tamién que ta redactáu nun llinguaxe cenciellu y con un preciu amañosu pa tol mundu. Na presentación del catecismu tuvo presente l'Obispu auxiliar Atilano Rodríguez, lo que da idea d'una bona actitú de la xerarquía eclesiástica Ilesia pa col nuestru idioma.