Cataluña, Euskadi y Galicia roblen un protocolu de política llingüística

Representantes de los gobiernos vascu, catalán y gallegu roblaron el pasáu vienres en Bilbao un protocolu xeneral conxuntu en materia de política llingüística. L'alcuerdu al que llegaron el viceconseyeru de Política Llingüística vascu, Patxi Baztarrika, el secretariu de Política Llingüística de la Generalitat, Miquel Pueyo, y la secretaria xeneral de Política Llingüística de la Xunta de Galicia, Marisol López, va tener una validez de trés años, siendo revisable y adaptable y col oxetivu de llevar alantre una collaboración estable y permanente en materia llingüística.

Amás del intercambiu d'esperiencies y campañes promocionales de los sos idiomes, l'alcuerdu ente les trés comunidaes va incluyir la reclamación al Estáu un "usu normalizáu" del euskera, catalán y gallegu, y el reconocimientu plenu d'estes llingües na Unión Europea. El protocolu reclama espresamente que se faiga posible l'usu de les trés llingües nes instituciones dependientes de l'Alministración central, casu del Congresu y el Senáu, l'alministración de Xusticia, Correos o Renfe. Los trés gobiernos implicaos nel alcuerdu aspiren a que los programes d'estudios de les demás comunidaes "inxerten conteníos sobre la presencia de les llingües minorizaes".