Castropol va acoyer unes xornaes sobre la Reserva de la Biosfera Ríu Eo, Ozcos y Terras de Burón

El conceyu de Castropol va acoyer unes xornaes sobre la Reserva de la Biosfera Ríu Eo, Ozcos y Terras de Burón esti xueves. Amás, van desarrollase actividaes en Ribadeo, el vienres, y n'A Veiga, la selmana qu'entra.
 
Pal xueves ta prevista una mesa redonda, a partir de les 19 hores, moderada pol xerente d’InterEo, Juan Santiago, na que tamién van intervenir Pablo Ramil, de la Universidade de Santiago de Compostela; Luis Baldó, del Club de Producto Turístico Reservas de la Biosfera; la xerente del Ceder Ozcos-Eo, Ana Suárez; y l’alcalde de Trabada y secretario de l’Asociación InterEo, José Manuel Yanes Ginzo. Esta cita ta enmarcada dientro de les xornaes sobre la Reserva de la Biosfera Río Eo, Ozcos y Terras de Burón qu’entamen la Asociación InterEo y la Sociedad Asturgalaica de Amigos del País.
 
Mentes, el vienres, l’actividá va pasar a Galicia, a la Casa da Letras de Ribadeo, nun actu onde van intervenir el direutor de Biodiversidá y Participación Ambiental d’Euskadi, Germán Alonso Campos, y el xerente de la Reserva de la Biosfera de los Ancares Lleoneses, Manuel Román. L’actu, que va principiar a les 19 hores, va tar presentáu pol direutor xeneral axuntu executivu de Novacaixagalicia, Javier García de Paredes. Yá la selmana qu’entra, les xornaes pasen p’A Veiga con dos sesiones nueves y una escursión pela ruta del ferrocarril Villaodrid-Ribadeo.