Castañón recita un poema de Texón nel actu pol trentenu aniversariu del Instituto Cervantes

Celebróse na sala Ernest Lluch del Congresu.

Esti añu l'Instituto Cervantes cumple 30 años y la Cámara Baxa acoyó esta mañana un actu conmemorativu col motivu del aniversariu, nel que tuvo presente Luis García Montero, direutor de la institución. Dellos parllamentarios lleeron poemes tanto en castellanu como n'otres llingües del Estáu, sonando l'asturianu na voz de Sofía Fernández Castañón.

La diputada de Podemos escoyó'l poema 'Sueñu/Suañu' de Pablo Texón. Enantes de la so llectura, apuntó en castellanu a los presentes que "ayeri abríase'l procesu de reforma del Estatutu d'Autonomía que permitirá lo que munches asturianes y asturianos lleven años lluchando: que se reconozan les llingües que se falen, l'asturianu y el gallego-asturiano, de manera oficial, reconociendo asina tamién la riqueza y pluralidá llingüística del conxuntu del Estáu. Como diz la poeta Vanessa Gutiérrez, "tu yes munches, munches veces, patria mía"".