Castañón pide rigor nos conteníos educativos de RTVE a Mateo poniendo l'exemplu del asturianu

|
Sofía Fernández Castañón Comisión RTVE Senáu

"Dicíase de la llingua asturiana que yera un dialeutu que taba en desusu dafechu", recordó la diputada de Xuníes Podemos.

El Senáu acoyó ayeri la Comisión Mesta de Control Parllamentariu de la Corporación RTVE y les sos Sociedaes. Na mesma, Sofía Fernández Castañón treslladó a Rosa María Mateo, alministradora provisional única de la Corporación RTVE, la entruga '¿Qué criterios pedagóxicos s'utilizaron pa escoyer les emisiones educatives en Clan TV?'.

La responsable respondió, nun primer momentu, que "el criteriu pedagóxicu de lo que se fixo en Clan aportólu'l Ministeriu d'Educación; Televisión lo que fixo foi editar los conteníos y emitilos". Na réplica, la xixonesa espuso que "el 26 de marzu, dientro de 'Lengua y Literatura', dicíase de la llingua asturiana que yera un dialeutu que taba en desusu dafechu, que nun se desendolcara como llingua y otru tipu d'afirmaciones que son prexucioses y pertenecen a otra época, polo que pidiríamos rigor pa lo próximo", lo qu'escuchó Mateo con atención, pa darréu reclamar a la direición de RTVE tresparencia, independencia y garantíes nos derechos llaborales de los trabayadores de la corporación pública.

Contador Estadistiques