Castañón gana l’Eloxu d’Oru a la meyor sidra del festival de Xixón

Sidra Castañón foi escoyida como la meyor ente les sidres que participaron na vixésima edición de la Fiesta de la Sidra Natural de Xixón. El coleutivu N’Ast critica a FAC pola “involución” d’esti certame no que se refier a la presencia del asturianu.
 
El llagar de Quintes convenció al xuráu espertu de la Fiesta de la Sidra Natural, mentes que Sidra Menéndez foi la que más prestó al xuráu popular d’ente la bébora de los venti llagares participantes nesta edición, que va ser recordada como la primera na que nun hubo sesión de tarde por decisión de la organización. El primer culín escancióse al meudía y el caberu, a les 15 hores, un recorte que nun prestó a los asiduos a una de les fiestes sidreres más importantes del país.
 
N’otru orde de coses, la sidrería El Cartero llevóse’l la primer edición de ‘Ties que dir a…’, gallardón que buscaba premiar al meyor chigre de la ciudá y na que participaben 18 establecimientos. Más de 5.000 persones votaron nesta categoría, por web o papeleta, pol que consideraben que yera’l culín meyor echáu de Xixón.
 
El ganador del concursu d’escanciadores de Xixón, puntuable pal Campeonatu d’Asturies, foi’l sierense Jonathan Trabanco (sidrería El Madreñeru y Manolo Jalín), mentes que Jorge Vargas (sidrería El Otru Mallu) ganó na categoría llocal. Por último, hai que destacar un récor nuevu d’escanciáu simultaneu de sidra, eventu que nesta ocasión axuntó a 7.576 persones, 282 más que l’añu pasáu.
 
Ausencia de la llingua asturiana
 
L’Asociación Cultural N’Ast criticó al gobiernu municipal de Foro Asturias Ciudadano (FAC) y al conceyal d’Educación, Cultura, Mocedá y Festexos, l’asturianista Carlos Rubiera, pola “involución” que sufrió l’asturianu nesta edición de la Fiesta de la Sidra Natural. “Dende N’Ast si bien podemos entender, anque nun compartir, que los pasos que se dean dende los gobiernos institucionales de Foro Asturias seyan mui progresivos, lo qu’enxamás vamos poder asumir nin reconocer comu llexítimo ye que se produza una involución nel escasu usu institucional de la llingua algamáu nos caberos años. Asina dempués de dos años d’usu del topónimu ‘Xixón’ nel Festival de la Sidra Natural d’esti conceyu por mor del llabor d’Izquierda Unida dende l’Ayuntamientu –y non precisamente cola simpatía de los qu’entós yeren los sos socios de gobiernu–, anguañu ésti esapaez con motivu de la vixésima edición d’esi eventu”, espliquen.
 
El coleutivu entiende que ye enforma más grave que l’asturianu nun solo tea arrequexáu, sinón en peor situación qu’años anteriores, nun certame dedicáu a la cultura sidrera, siempre venceyada a la llingua del país. “Esta involución amás ye especialmente doliosa yá que la persona qu’acupa nestos momentos la conceyalía de Cultura del Ayuntamientu, Carlos Rubiera, siempres se definió pol so compromisu colo llingua asturiana nel pasáu”, asegura N’Ast.
 
“Dende N’Ast, calteniendo la nuesa llinia de defender la llingua y la identidá asturianes con independencia del collor políticu de los distintos gobiernos, reivindicamos tanto l’usu únicu del topónimu ‘Xixón’ como la edición n’asturianu de tolos materiales que se sacaron en castellanu”, finaliza’l comunicáu.