Casi la metá de los palestinos ta dispuestu a reconocer un Estáu xudíu

|

Los palestinos tán dividíos sobre la reconocencia d'Israel como un Estáu xudíu, según un sondéu publicáu esti xueves pol diariu hebréu 'Yediot Ahronot' y realizáu a palestinos residentes en Cixordania, la Franxa de Gaza y Jerusalén Este.

Per otra parte, más de la metá de los israelinos muéstrense dispuestos a apoyar una negociación con Hamás.
  
Según esta encuesta, el 49 por cientu dícense dispuestos a reconocer a Israel como Estáu xudíu, mientres que'l 48 por cientu refuga esta posibilidá. Estos resultaos contrasten con un sondéu realizáu en xunu, antes que se retomaren les conversaciones directes ente palestinos y israelinos, dao qu'entós el 58 por cientu taben dispuestos a reconocer a Israel como Estáu xudíu, frente al 39 por cientu.
  
El sondéu publicáu esti xueves realizólu'l profesor Yaacov Shamir de la Universidá Hebrea de Xerusalén y el profesor Jalil Shikaki, que dirixe'l Centru Palestín pa la Investigación Política y los Sondeos, con sede en Ramala. Fízose sobre una muestra de 1.270 palestinos n'entrevistes cara a cara.
  
Per otra parte, el 78 por cientu de los 610 israelinos consultaos per teléfonu espresaron el so apoyu a les negociaciones directes que volverán entamar a primeros de setiembre, frente al 30 por cientu de los palestinos qu'espresaron esti mesmu sentimientu.
  
Sí paez haber mayor sintonía sobre les perspectives d'éxitu de les conversaciones. Asina, namás el 6 por cientu de los palestinos y el 5 por cientu de los israelinos creen qu'hai munches opciones d'un acuerdu. Coles mesmes, el 56 por cientu de los israelinos dicen qu'apoyaríen conversaciones con Hamas pa llegar a un acuerdu final. De fracasar les negociaciones, el 51 por cientu de los palestinos dicen qu'apoyaríen medios non violentos de resistencia popular a la ocupación israelina.
  
Sobre la violencia

A lo último, el 54 por cientu de los israelinos dicen tar preocupaos pola posibilidá de resultar firíos nun actu de violencia palestín mientres la so vida diaria, mientres que'l 76 por cientu de los palestinos temen resultar firíos por violencia israelina.
 

Contador Estadistiques