Cascos: "La degradación del PP d'Asturies nun tien comparanza"

L'ex ministru de Fomentu Francisco Álvarez-Cascos denunció'l “nivel de degradación" del PP d'Asturies, qu'al so xuiciu, "nun tien comparanza". Amás, aseguró qu'a la dirección estatal de los 'populares' "impórta-y 'un comino'" esta comunidá.

Dalgo que, al so xuiciu, confirma la declaración de la secretaria xeneral del PP, María Dolores de Cospedal, enmarcando nel "interés xeneral" la designación del candidatu por Asturies.
  
"La frase d'invocar l'interés xeneral avala lo que dixe'l día 2 de xineru: los intereses d'Asturies y los asturianos nun entren nel conceptu d'interés xeneral de la dirección estatal del PP", declaró Álvarez-Cascos nuna entrevista en Telemadrid, recoyida por Europa Press.
  
L'ex ministru dixo que'l PP asturianu foi "deteriorándose" nestos años y trátase d'un partíu vinculáu "a les decisiones unipersonales del alcalde d'Uviéu", Gabino de Lorenzo. "Y la xente que quier ver al PP como partíu ganador nun pue tar contemplando impasible'l nivel de degradación del PP asturianu", esclamó.
  
Al so entender, "el nivel de degradación del PP d'Asturies nun tien comparanza". "De les organizaciones del Partíu Popular que yo conozo, nenguna ufierta nos últimos diez años un deterioru asemeyáu", aprofió, p'añadir que por esi motivu unvió un documentu a la dirección estatal proponiendo un congresu pa ganar les próximes elecciones. "Yo creo nos congresos, nun creo en los xestores", proclamó.

Prematuro pa ver si se presenta
Álvarez-Cascos indicó que ye "prematuro" pa saber si va presentase o non a les elecciones autonómiques con un nuevu partíu, dao que, según esplicó, "participar nun proyectu colectivu que puea dir a unes elecciones precisa xente, equipu, medios".
  
A preguntes poles declaraciones de la presidenta de la Comunidá de Madrid, Esperanza Aguirre, sobre si algo fairíen "mal toos", l'ex ministru dixo que "el tiempu lo dirá", pese a qu'almitió qu'agora arrepiéntese de tar calláu mientres "tanto tiempu".
  
"Pensé que con eso se podía algamar un ambiente de proximidá, de coincidencia y d'unidá y veo que'l mio silenciu utilizáronlu los mios adversarios pa enllenar la campaña de menosprecios, descalificaciones y d'insultos, y qu'a la fin algamaron los oxetivos políticos que buscaben", acabó.