Cascos inauguró'l tramu Xixón-Villaviciosa

El Ministru de Fomentu inauguró ayeri'l tramu de l'Autovía del Cantábricu ente Xixón y Villaviciosa. Con 9.179 metros de desarrollu, el tramu entama n'Arroes y remata nel enllace de Grases, au empata cola A-64 Lieres-Villaviciosa. Esti tramu yera l'últimu que quedaba por facer pa conectar Xixón col oriente d'Asturies por autovía, y tamién foi ún de los más difíciles de facer, con cinco viaductos ente los que'l más grande ye'l que pasa'l Valle de Pión, de 592 metros y con unos encontos d'hasta 84 metros d'altura. L'autovía ente Xixón y Villaviciosa, que tenía hasta agora'l récord del túnel más caru de tol estáu col pasu perbaxo de la Ría de Villaviciosa, tien agora, según afirma'l ministeriu de Fomentu, la marca del túnel más llargu d'Asturies, que ta en Ñévares y tien 2387 metros. El presupuestu total de la obra foi de 169 millones d'euros.

Nel actu d'inauguración, el Ministru de Fomentu dixo que yera'l día "más importante" dende que lleva'l Ministeriu de Fomentu y nun tuvo namás que pallabres negatives pal papel del PSOE na xestión de l'autovía, acusando al PSOE de ser "enemigos del norte" y al presidente Areces de permitir, de la que yera alcalde, de torgar que Xixón tuviere accesu a l'Autovía del Cantábricu per carretera de calzada doble.