Cascos espresa la so disponibilidá a ser candidatu

L'ex vicepresidente del Gobiernu y ministru de Fomentu, Francisco Álvarez Cascos, aseguró que na dirección del PP hai persones que conocen la so "disponibilidá" pa encabezar la llista por Asturies nes elecciones autonómiques del 2011.

Eso sí, manifestó tar "ablucáu" pola "pasividá" que mostró la dirección estatal "ante los insultos" que recibió per parte de miembros del PP asturianu.
  
"Ficiéronme de menos al llamame 'galácticu'; tratáronme despectivamente de sexaxenariu; faltárome como terrorista caleyeru, y too ello con membrete del PP", aseguró Cascos nuna entrevista concedida al Diario Montañés, que recoyó Europa Press.
  
Al pregunta-y cómo encaxa esa crítica dende'l so propiu partíu, Álvarez Cascos almitió que-y causó "cierta sorpresa". "Qu'a una persona como yo, que nun sólo acepta, sinón que defende que los órganos del partíu competentes tomen les decisiones que-yos correspuende cola máxima llibertá, la censuren en términos de faigo de menos, descalificación y d'insultu, nun dexa de causame sorpresa".
  
L'ex secretariu xeneral del PP calcó en que "na historia del PP nun hai precedente d'insultos, descalificaciones y menosprecios sin sanción". "Y nesti casu nin siquier se produxo una llamada d'atención. Nesta situación he mostrar la mio perplexidá pola pasividá de los órganos competentes del partíu", sorrayó.

“Nun me moví”
Sobre la so posible vuelta a la política activa, l'ex ministru señaló alcontrase "onde siempre" y que "nun se movió". "Ofrecí la mio disponibilidá al partíu pa encabezar la candidatura del PP n'Asturies, a requerimientu de munches persones que me lo pidieron. Y ésa ye la mio actitú", añadió.
  
Preguntáu si nun-y sorprende que Rajoy nun interviniere yá, nun sen y otru, Álvarez Cascos respondió qu'él nun tien que facer "xuicios d'intenciones sobre los demás". Según dixo, "caún tien la so responsabilidá" y la suya "empezar por recordar" que nun pidió "nada", que nun buscó "nada" y qu'acepta "lo que los órganos del partíu decidan".
  
"Lo único que saben los que tienen que sabelo na dirección del partíu y los que tienen que sabelo por razones de proximidá y amistá, ye que Francisco Álvarez Cascos ofreció disponibilidad y nun se movió d'esa posición", acabó.