Carreño torna a saborgar la victoria dos años depués de ganar n'Estoril

|
Pablo Carreño ganador nel Chengdu Open

Suma en Chengdu'l so cuartu títulu ATP.

Pablo Carreño superó ayeri na final del Chengdu Open al kazaquistanín Alexander Bublik pol resultáu de 6-7(5), 6-4, 7-6(3) en dos hores y ocho minutos de partíu. Creáu nel 2016, el xixonés conviértese nel cuartu ganador d'esti tornéu chinu ATP World Tour 250 tres Kharen Kachanov, Denis Istomin y Bernard Tomic.

"Foi una selmana increíble equí en Chengdu. Foi un placer pa min tornar a tar equí. Mientres la selmana sentíme realmente cómodu na pista. La superficie yera rápida, pero tuvi mui bien col serviciu mientres tolos mios partíos y pienso qu'eso foi la clave pa llevame la victoria del tornéu. Esti añu foi mui difícil pa min poles lesiones al comienzu de la temporada. Ye realmente mui difícil cuando nun pues xugar nin divertite con esti deporte. Pero traté de siguir trabayando duro porque sé que cuando trabayes y faes lo máximo posible normalmente algames el premiu. Mira, agora toi equí col troféu, ganando'l mio cuartu títulu ATP. Ésta ye la razón pola que siguo lluchando y xugando esti deporte", destacó Carreño tres llevar la final.

El xixonés, que llegó a entrar nel top 10 de la llista ATP en setiembre del 2017, suma asina Chengdu a los sos trunfos en Winston-Salem y Moscú, nel 2016, y Estoril, nel 2017. Toos ellos son torneos de categoría ATP World Tour 250.

Semeya propiedá del Chengdu Open.

Contador Estadistiques