Carreño, primer asturianu en ganar la Davis Cup como tenista

|
Pablo Carreño campeón de Davis Cup 2019

El xixonés formó parte del equipu español que superó na final a Canadá, anque namái xugó un partíu na competición qu'estrenó un formatu que dexó munches duldes.

Pablo Carreño convirtióse ayeri nel primer tenista asturianu en ganar la Davis Cup. Enantes ganara la ensaladera Juan Buatista Avendaño, nel 2000 y nel 2004, les dos primeres pa España, pero como uno de los capitanes del equipu.

El xixonés namái xugó un partíu, el primeru de cuartos de final, el vienres, contra l'arxentín Guido Pella, que perdió pol resultáu de 7-6 (7-3), 6-7 (4-7) y 1-6. Rafael Nadal, gran protagonista de la competición, superaría darréu a Diego Schwartzman y llueu llevaría'l dobles xunto con Marcel Granollers.

En semifinales España derrotó a Reinu Xuníu (2-1), pa ganar la final a Canadá (2-0) con Roberto Bautista como titular a pesar de la muerte del so padre hores enantes. Finaba asina la primer edición de la nueva Davis Cup, que dexó duldes sobre manera polos horarios, con partíos que llegaron a finar a les cuatro de la mañana, y pol formatu de competición, con seleiciones yá clasificaes que nun disputaron dalgún partíu, como fixo Canadá nel dobles con Estaos Xuníos.

Semeya propiedá de Davis Cup.

Contador Estadistiques