Carne de gallina, nos cines del país

Yá ta nos cines d'Asturies Carne de Gallina, l'últimu trabayu del director Javier Maqua. Karra Elejalde, Nathalie Seseña y Anabel Alonso son los intérpretes más importantes d'esta película que se-y ocurrió facer a Maqua dempués d'una entrevista colos trabayadores de Duro Felguera que taben trancaos na Catedral d'Uviéu va yá cinco años. L'escritor Maxi Rodríguez trabayó con Maqua pa escribir el guón d'esta comedia rodada en Mieres que quier retratar la situación que se vive anguaño nes cuenques mineres, onde families enteres dependen d'una prexubilación d'Hunosa. Pues ver los horarios y cines en que la echen na cartelera d'Asturies.comCon un guión que nun dexa de recordar al de la irlandesa "Despertando a Ned", anque muncho menos inocente, Carne de Gallina cuenta la historia de los Quirós, una familia que tien d'esconder el calabre del padre pa que naide nun s'entere de qu'acaba de morrer nun chigre de mala fama y aguardar hasta'l llunes pa poder cobrar unes perres. Los personaxes van resulta-y familiares a más d'ún, como los dos fíos de Luisón Quirós: el mayor fracasó cola so discoteca "Agata's" (n'honor a la so muyer) y l'otru, a los sos trenta y pico d'años, y cola carrera de filólogu, sigue atecháu en casa y entretiense entrenando a los rapacinos d'un equipu de fútbol. Anque la película nun ta rodada n'asturianu, los autores dicen que tuvieron especial precuru en que nun sonare raro a la oreya d'un espectador d'equí. Nel web oficial de la película puede vese un trailer que confirma'l bon aquel del equipu del filme. Tamién puen descargase cachos de la banda sonora, qu'inclúi un tema entituláu "asturtxales".