Carmen Rúa acusa a Educación de torgar la escolarización del asturianu

La Conceyala d'Educación de Xixón denunció na presentación de l'Axenda Escolar del conceyu que la Conseyería d'Educación nun manda los mayestros que se precisen pa cubrir l'aumentu de la demanda d'asturianu nos centros de secundaria del conceyu.

La presentación de l'Axenda educativa de Xixón salióse del guión escritu, y lo que tenía de ser un cenciellu actu de la Oficina de Normalización de Xixón presentando un material pa los escolinos de secundaria de la ciudá convertióse nel altavoz de la quexa de la responsable d'educación del conceyu, qu'echó pel departamentu de Riopedre por nun poner profesoráu abondo d'asturianu.

La responsable de la Oficina de la Llingua de Xixón presentó a los medios l'Axenda Escolar de Xixón, una axenda-diariu redactada n'asturianu y qu'enxerta información útil pa los escolinos, con conteníos culturales y efemérides d'interés. , de la que se tiraron 1.000 unidaes, va dáse-yos a tolos neños y neñes que se matriculen n'asturianu nos centros de secundaria de Xixón

La presentación del llibrín valió tamién d'introducción al cursu escolar na ciudá , y asina María Xosé Rodríguez aportó datos sobre los índices d'escolarización d'asturianu na villa de Xovellanos, adelantando qu'en secundaria pasóse de los 420 estudiantes matriculaos n'asturianu nel cursu 2003-2004 a 624 nesti cursu 2004-2005 acabante d'entamar, momentu en que carmen Rúa interrumpió les esplicaciones de la responsable de la Oficina de la Llingua pa denunciar l'actuación de la Conseyería d'Educación na escolarización del asturianu

Rúa esplicó que, anque hai efectivamente 624 matriculaos oficialmente, la demanda d'asturianu nos institutos de Xixón ye muncho mayor, llamentando que munchos neños y neñes nun van poder recibir l'asignatura por nun tener profesor asignáu pola Conseyería d'Educación. La conceyala dixo que, de momentu nun saben exactamente cuantos casos de grupos d'asturianu ensin profesor pue haber, llegando a acusar a Educación de torgar la escolarización del asturianu.

Por poner un casu, María Xosé Rodríguez y Carmen Rúa dixeron que l'Institutu San Llorienzo, ún de los concertaos que funcionen na ciudá, alcontróse con que, nun grupu en que teníen 14 estudiantes que pidieren francés como optativa y otros 12 que pidieren asturianu, en cuenta de facer dos grupos, la Conseyería púnxo-yos francés a los 26 escolinos. La responsable de la Oficina y la Conceyala d'Educación citaron tamién el casu de la Universidá Llaboral, onde otru grupu de 11 escolinos quedó tamién ensin profesor asignáu pola Conseyería, momentu en que María Xosé Rodríguez esplicó que, amás de la falta de personal pa poner clas, munchos centros nin siquiera dieron opción nos impresos de matrícula a pidir asignatura d'asturianu, una denuncia que yá ficiere la otra selmana la Xunta Pola Defensa de la Llingua.