Carlos Madera y Alberto Toyos presentaron l'anuariu AMAS de la música asturiana

El director xeneral de Promoción Cultural Carlos Madera asistió ayeri a la presentación del Anuariu de la Música n'Asturies AMAS, que naz col oxetivu de recoyer y conseñar tola actividá musical asturiana.

El director d'esti anuariu, el periodista musical Alberto Toyos, esplicó que l'anuariu AMAS va vendese al preciu de diez euros col acompañamientu d'un CD con 17 cantares editaos n'Asturies nel añu 2005, ente ellos dellos de grupos que tan entamando o que tienen poca sonadía p'ayudalos a que tengan más propaganda. Toyos aclarió que s'intentó da-yos un güecu n'anuariu y discu a tolos estilos musicales que se trabayen n'Asturies, dende l'hip hop al rock y el pop pasando pel folk, too ello peñerao d'ente los más d'ochenta discos que s'editaren n'Asturies nel añu 2005 y que pal responsable de l'anuariu "tienen una calidá media bien alta". Toyos emponderó'l que s'asoleyaren tantos discos nun momentu en que la industria discográfica ta pasando apretures y nel que los grupos qu'entamen tienen mui difícil el dar conciertos.