Carlos Lastra asegura que “los políticos nun faen por qu’Asturies sía ‘Paraísu Natural’”

L’académicu y presidente d’ANA, Carlos Lastra López, dio la conferencia cabera de la UABRA, qu'esti vienres peslló les sos puertes. Na so intervención aseguró que “los políticos nun faen por qu’Asturies sía ‘Paraísu Natural’”.
 
La conferencia, entitulada ‘Asturies ¿Paraísu Natural?’, tuvo llugar ayeri nel salón d’actos del IES de Cangas del Narcea énte la totalidá del alumnáu y profesoráu de la UABRA. “Toos consideramos qu’Asturies ye un Paraísu Natural”, destacó nel so entamu Lastra, qu’eloxó l’eslogan creáu nel tiempu nel que Pedro de Silva yera presidente del país. El presidente de l’Asociación Asturiana d’Amigos de la Naturaleza (ANA) fixo referencia “a un privilexu de paisaxe que respuende a una cultura tradicional”, pero opinó que los políticos ven esi ‘Asturies Paraísu Natural’ “namái como un eslogan”. “Si dalguna vez lo creyeron, nun faen por que sía asina”, añadió Lastra, qu’apunta que “hai que facer pol caltenelo”.
 
El profesor titular del departamento de Biloxía d’Organismos y Sistemes de la Universidá d’Uviéu apuntó que’l mantenimientu de la naturaleza y fauna d’Asturies “tien posibilidaes económiques de futuru” y amás supón daqué importante pa les zones rurales del país. Asina, na so opinión, l’excursionismu, el turismu de naturaleza o la caza fotográfica pue ser una bona fonte de recursos p’Asturies.
 
Piesllu de la UABRA
 
Esti meudía tuvo llugar el piesllu de la Universidá Asturiana de Branu (UABRA) con un pinché una Escuela-Hogar nel que participaron alumnos y profesores, y nel que tuvo presente l’alcalde de Cangas del Narcea, José Luis Fontaniella Fernández, y la conceyala de Cultura, Educación, Deportes, Mocedá y Formación, Muyer y Igualdá, Marta Fernández Álvarez. El direutor de la UABRA, Xosé Antón González Riaño, destacó’l bon clima que se vivió nesta edición de los cursos y anunció que’l piesllu oficial va tener llugar, de nun haber cambios d’última hora, el vienres 14 de setiembre nel Aula Magna de la Universidá d’Uviéu cola presencia del rector, Vicente Gotor, y el primer edil de Cangas.