Cantándo-y al mundu dende Xedré

Pedru Pereira ye una cantautor de Cangas del Narcea que ta acabante de sacar el so primer discu "Xedré", una de les meyores noticies musicales d'esti país anguaño.

La tradición de cantautores n'asturianu que guañó nos primeros años del surdimientu paecía que nun topare heriedes hasta agora. Nuberu, Carlos Rubiera, Xulio Ramos...etc, persones y estilos que marcaron los primeros años del "nuevu canciu astur", nun paecía que tuvieren un filu continuador nel sieglu XXI. Pero la música atoña, busca y normalmente alcuentra, pero amás dacuando failo volviendo a formules cencielles y conocíes que precisamente por eso lleguen a ser mui complicaes de facer bien. L'exemplu d'esta rexeneración del cantautor ye ,col permisu de Toli Morilla, Pedru Pereira, un mineru de Cangas del Narcea que camuda la ferramienta cola que trabaya na tierra pol instrumentu musical, pasando del picu a la guitarra pa escarbar na memoria del país. El so primer discu "Xedré" ye l'espeyu musical d'una esperiencia esistencial inevitablemente arreyada al sitiu onde vive y a unos sentimientos que marquen el ritmu de la so vida.

P'algamar la difícil xera de llegar a espresar too eso nun discu, Pedru Pereira cuenta cola so voz, una guitarra, y les lletres d'él mesmu, de Naciu-i Riguilón y Gema Martínez. Nelles cuéntase dende la historia d'amor más desesperáu, hasta l'homenaxe la vida de les muyeres que trabayen nes mines. Too ello n'asturianu occidental, que ye'l meyor idioma pa canta-y al mundu dende Xedré. Pedru, con too y con ello, nun quedó solu cola so guitarra pa sacar esti "Xedré", contando nel llabor coles collaboraciones de Fran Gayo (es-Cambaral, Mus) cola Cítara y melódica, l'ex-Penelope Trip Pedro Vigil col Hamond, vibráfonu y lap-stell, Miguel Cañas nel vigulín. Sonia Elijovich punxo'l so cello, Manuel Molina, los bongos y Andrés López el djembé, arrodiando toos al cantautor del occidente asturianu, que, de cualquier manera, defiéndese mui bien cuando ta solu nel escenariu tocando los mesmos temes del discu, amosando una naturalidá que ye mui d'agradecer.

"Xedré" sala a la cai espublizáu pola casa de discos "Ámbitu", ta producíu por Pedro Vigil y grabóse esti branu nos estudios Teisco de Xixón.