Cano afirma qu’anguaño’l “mieu a la oficialidá ye irracional dafechu”

La presidenta de l’ALLA, Ana María Cano, ve vidable la oficialidá nos tiempos de güei y considera “irracional dafechu” el mieu a dar el pasu. Dellos miles de persones reclamaron esti derechu nes cais d’Uviéu enantes del actu académicu.

Énte’l públicu presente nel Teatru Campoamor, con dellos representantes políticos presentes, Cano lleó un discursu institucional nel, qu’amás de nun escaecer la demanda de la oficialidá, recordó tamién que cola entrada de la ‘Llei Wert’ “ta nes manes del Gobiernu d’Asturies el futuru de la presencia escolar del asturianu” y dexo nidio l’enfotu de l’Academia de la Llingua Asturiana (ALLA) en caltener el llabor académicu d’investigación y siguir cuntando col personal adscritu a la institución pese a los recortes presupuestarios. Sonia Avellaneda y Próspero Morán encargáronse de presentar l’actu, qu’abrió’l gaiteru Álvaro Cueto y nel que l’ALLA acoyó al doctor n’Inxeniería Informática y profesor del área d’Inxeniería Telemática de la Universidá d’Uviéu, David Melendi Palacio, como académicu.

L’uviedín criáu n’El Berrón calificó de “honor” la llamada de l’ALLA y lleó un discursu que principió señalando que “esperen que fale de bits y de bytes, pero voi cuntar un cuentu”, recordando dellos episodios de la so infancia nel que la llingua tenía un papel destacáu. Melendi criticó a los asturianos que refuguen la so cultura y señaló que la situación del idioma “ye crítica” nuna globalización que crea “clones culturales”. “Yo soi pesimista, pero como bon asturianu soi testerón y sé qu’el so futuru ta nes nueses manes”, añadió, pa finalizar señalando que’l nomamientu como académicu ye “un honor que creo nun merecer, pero qu’acepto gustosu” y qu’espera contribuyir a l’Academia “colos mios conocimientos”.

La siguiente en tomar la pallabra foi Cano, que principió la so intervención destacando los méritos de Melendi pa, darréu, facer un repás a l’actividá de l’ALLA nel añu últimu. Tamién fixo referencia a la crisis y al compromisu social de la institución pese a los recortes presupuestarios: “L’Academia tuvo qu’escoyer ente dos opciones: rebaxar automáticamente un 30 por cientu toles partíes presupuestaries (incluyendo les correspondientes al personal contratao de l’Academia) o, bien, priorizar unes aiciones en perxuiciu d’otres. Y del resume del llabor académicu nesti caberu añu que vengo de facer, cualquiera pue decatase de que la institución escoyó la segunda opción. Darréu d’ello, agora mesmo l’Academia (como persaben los que siguen el so facer diariu) malpenes espubliza la metá de lo qu’espublizaba años atrás (hai importantísimos trabayos d’investigación fechos que nun puen de momentu ver la lluz; la mesma convocatoria de los Concursos de l’Academia sigue entá aguardando). Pero pa nós ta mui claro, l’oxetivu, nestos tiempos de crisis, ye siguir cuntando col personal adscrito a la institución y caltener el llabor académicu d’investigación, de normativización y de dignificación de la llingua cuntando estrictamente con esti personal. Queremos que se sepa y que se pescancie esta decisión como daqué que xurde del inequívocu compromisu social de l’ALLA, una de les sos señes d’identidá y a la qu’enxamás vamos a arrenunciar.

A continuación rellató les actuaciones de la institución nel planu de la política educativa del Estáu y la situación na que queda agora la materia de Llingua Asturiana y Gallego-asturiano cola entrada de la ‘Llei Wert’. “Nun ye lo que nós demandábemos, pero sí ye una opción que dexa nes manes del Gobiernu del Principáu d’Asturies el futuru de la presencia escolar del asturianu. Esto hai que dicilo claramente, d’aprobase la llei Wert cola actual redaición, ésta nun torgaría les posibilidaes educatives del asturianu, sinón qu’éstes dependeríen direutamente y namái de la decisión política que tome’l gobiernu asturianu. La decisión ta, entós, n’Asturies y el gobiernu tien la responsabilidá bien de desaniciar la presencia escolar de la llingua (o d’asitiala nunes condiciones de precariedá que llevaríen a lo mesmo) o, bien y a la escontra d’ello, la responsabilidá d’aprovechar el marcu llegal, pa encontar efeutivamente la escolarización del asturianu. La escoyeta –cuido− nun debería almitir dulde”, afirmó.

Por último, centró’l so discursu na reclamación d’oficialidá y destacó’l momentu actual como afayadizu pa dar esti pasu, “en primer llugar, porque les circunstancies de precariedá representen un peligru añadíu pa les cultures minoritaries y, en segundu, porque, magar esta precariedá, la llexislación (a nivel d’estáu y de comunidá) sigue xenerando disposiciones llegales que, como acabamos de ver, inciden mui negativamente sobre aquelles comunidaes que, desdexando los mandaos constitucionales, nun tienen proteición xurídica efeutiva pa cola llingua propia”. Al respeuto, añadió que “a estes altures de desarrollu constitucional y democráticu, el mieu a la oficialidá ye irracional dafechu, ¿a quién-y pue meter mieu una comunidá autónoma d’un millón d’habitantes qu’aspira a un billingüismu integrador? ¿Cuáles son les razones ideolóxiques o de clas –si se quier− que xustifiquen que se desanicie una llingua y una cultura minoritaria? ¿Progresó social, económica y culturalmente Asturies estos caberos trenta años por dexar a un llau la so responsabilidá pa cola llingua asturiana? Asturies tien munchos problemes, dende llueu, y ún d’ellos, non menor, ye’l del complexu históricu d’inferioridá en cuantes a la cultura popular. Y una comunidá nun pue avanzar si nun ye a llibrase de los complexos que la faen despreciar la so herencia histórica”.

Pa finar, Cano dio un “llamáu a la esperanza, porque sí ye posible un futuru pa la llingua, mientres haya asturianos y asturianes enfotaos como David Melendi, que sepan xuntar lo propio colo universal; y sí ye posible falar d’oficialidá, mesmamente nestos momentos de tanta crisis económica; o, xustamente por ello, más agora qu’antes, ye necesaria la oficialidá, porque ye agora cuando más encontu precisa la llingua”, añadiendo a continuación que “l’Academia sabe cómo se pue llevala alantre con un presupuestu axustáu, axeitáu y asumible”. Una llectura de poemes y una actuación de Toli Morilla zarraron un actu que contó con una amplia presencia institucional, con representantes de tolos grupos parllamentarios, cola esceición única d’Unión Progreso y  Democracia (UPyD), dellos vicerrectores y una bona cantidá de profesores universitarios. Asina, tuvieron presentes el congresista Antonio Trevín y la diputada Pilar Alonso, pol PSOE; el senador Isidro Martínez Oblanca y la diputada María del Mar García Poo, de Foro de Ciudadanos; el diputáu Alfonso Román, l’edil xixonés Paco Cubiella y el conceyal de Cultura del Conceyu d’Uviéu, Jorge Menéndez Vallina, pol PP; y el senador Jesús Iglesias, el coordinador xeneral Manuel Orviz y l’alcalde de Mieres, Aníbal Vázquez, por Izquierda Xunida. Tamién se pudo ver nel Campoamor a dellos representantes sindicales y al presidente del RIDEA, Ramón Rodríguez, ente otres personalidaes. 

Manifestación multitudinaria

Dellos miles de persones, 5.000 según la organización, participaron na manifestación convocada pola Xunta pola Defensa de la Llingua Asturiana (XDLA) con motivu del XXXIV Día de les Lletres Asturianes col lema ‘L’asturianu, llingua oficial’. El bon tiempu, con sol depués de dellos años cola lluvia como acompañante, fixo que más xente se sumare a la marcha con salida na Estación del Norte y final na puerta del Teatru Campoamor. Na marcha dexáronse ver con pancarta los partíos, sindicatos y coleutivos siguientes: l’Asamblea de Maestros de Llingua Asturiana y Gallego-asturiano, Izquierda Xunida, CC OO Enseñanza, Reciella, FETE-UXT, CSA La Semiente, un grupu de falantes de gallego-asturiano, Iniciativa pol Asturianu, SUATEA, Compromisu por Asturies, Andecha Astur y CSI.

Al final de la marcha, Verónica Álvarez Cachafeiro lleó’l discursu de la XDLA nel que criticó “el fedor que sal de la nuestra castra gobernante” y recordó los trenta años de reivindicación “onde los dirixente políticos asturianos tuvieron tola capacidá, competencies y oportunidaes pa reconoder derechos fundamentales, pa dar un marcu llegal xustu d’oficialidá y p’asentar les polítiques qu’aseguren el futuru del idioma”. Sicasí, la situación anguaño ye de “asfixa programada de les poques coses qu’había: servicios de normalización, medios de comunicación, producción lliteraria y musical…”. “El cantar ye siempre’l mesmu: ‘tamos pola promoción pero non pola oficialidá’. Yá valió”, reclamó Álvarez Cachafeiro.

Tres facer un repás al murniu panorama actual, faciendo un énfasis especial na educación y nel informe sobre la presencia del idioma na TPA ellaboráu pola organización, que vio la lluz el mes pasáu, la XDLA aseguró que va siguir “plantando cara a los que niguen derechos y lluchando polo que creemos y queremos. Y pa eso tenemos que tar siempre solertes, pa tornar el prexuiciu y pa contruyir espacios nuevos pa la llingua, pa ponenos de pie na esixencia d’un futuru dignu. Y ye un trabayu qu’hai que facer yá, nun hai sides posibles. Hai qie preparar el día depués tres esta nueche de velea qu’anubió los nuestos suaños y los nuestros derechos”.