Cangas ta celebrando la XIII Sumana de las Ḷḷetras Asturianas

Teatru, esposiciones y música componen la programación d'esta celebración entamada dende'l Serviciu de Normalización Ḷḷingüística.

Un mayu más, Cangas del Narcea celebra la so Sumana de las Ḷḷetras Asturianas, qu'algama yá la decimotercera edición. Ésta desendólcase estos díes, anque s'abrió'l vienres con una campaña sobre movilidá sostenible deseñada pol alumnáu del institutu llocal.

De nome 'Meyor en bici', tien la collaboración de la Policía Llocal, y cuenta con un diseñu, eslóganes y hasta una pegatina a partir del trabayu de los escolinos. Amás instaláronse dos aparcabicis nel centru educativu y púnxose una charra sobre seguridá vial.

Esta tarde, a les 19 hores, va principiar la Sumana como tal cola inauguración na Casa la Cultura 'Palaciu d'Oumaña' de la esposición itinerante 'Triloxía poética: Al horru', integrada por 60 poetes y otros tantos artistes plásticos que faen homenaxe a esti patrimoniu arquiteutónicu asturianu y que se va poder visitar hasta'l día 31. Fermín Santos, direutor d'Ediciones Pata Negra, empresa responsable d'esta iniciativa, va tar presente nel actu.

Lo de nueso

Otra amuesa que se va inaugurar ye 'Lo nueso', el martes a les 19 hores, espaciu espositivu permanente na Casa la Cultura 'Palaciu d'Oumaña'. Ésta presenta elementos representativos de la cultura canguesa, dalgunos antiguos enforma.

El día siguiente, miércoles, lo propio siguen teniendo protagonismu con 'Los nuesos sones', de Javier Tejedor, espectáculu dedicáu n'esclusiva a esta pieza fundamental del folclor cangués. Va ser nel Toreno a les 20 hores.

El segundu conciertu de la Sumana va tener llugar el vienres, a les 20 hores, nel Toreno con Calea. El tríu formáu por Rubén Bada, Silvia Quesada y Leticia Baselgas va interpretar, ente otros, el cantar compuestu polos alumnos del institutu que grabó con motivu de la campaña 'Al Son del Cantar' de la Rede de Normalización Llingüística nos Conceyos.

Públicu escolar y homenaxe a María L'Acebu

Mañana los escolinos de Primaria del conceyu van poder disfrutar de la representación de 'Grana de cardamomu', d'El Callejón del Gato, nel Teatru Toreno. Mentes, el xueves van ser los de Secundaria los que van ver nesti mesmu llugar teatru en llingua asturiana con 'La reina de la guapura de Leenane', de Producciones Nun Tris, obra ganadora del últimu Premiu y Festival Nel Amaro de Teatru Profesional en Llingua Asturiana y Gallego-asturiano.

Va poner el ramu a les actividaes d'esta gran fiesta de la nuesa lliteratura un homenaxe a María L'Acebu, "una muyer que promueve ya dignifica cumo poucas personas pueden la nuesa ḷḷingua ya la nuesa cultura milenarias". L'actu, cargáu de simbolismu, va desendolcase dende les 11 hores en L'Acebu cola collaboración del ATOAM (Archivu de la Tradición Oral d'Ambás), Xeitu, El Baiḷḷe, Lo Nueso, la Sección Tradicional de la Escuela de Música del Conceyu, Manu ya Naciu'i Riguilón y la familia de María.

Na imaxe superior, pegatines de la campaña 'Meyor en bici'.