Cangas del Narcea saca a concursu la plaza del so Serviciu de Normalización

El Conceyu de Cangas del Narcea ta acabante de convocar una plaza de responsable del serviciu de normalización llingüística. La plaza, a tiempu parcial, ta empobinada a universitarios que tean en posesión del títulu d'Especialista o Espertu en Filoloxía Asturiana qu'espide la Universidá d'Uviéu, del títulu de Llingua Asturiana pa Enseñantes de la Conseyería de Cultura o de los cursos inicial, mediu y superior de l'Academia de la Llingua Asturiana. Los aspirantes habrán demostrar nes prebes un profundo conocimientu llingüísticu fondu de la variante occidental del asturianu, según s'esplica nes bases de la convocatoria que puen recoyese nel área de Cultura y la Oficina d'Información Xuvenil del Conceyu de Cangas del Narcea.

El plazu de participación na convocatoria remata a los diez díes naturales dempués d'espublizase l'anunciu oficial en prensa escrito de la convocatoria. La plaza va contar con una retribución bruta al mes de 688,95 euros y el contratu va ser del tipu "por obra o serviciu" tando condicionada la duración del mesmu a la subvención que conceda'l Gobiernu asturianu y que pel momentu garantiza la esistencia del serviciu hasta'l 31 d'avientu del 2005.

La preba va consistir nuna fase d'oposición eliminatoria que va incluyir un exerciciu de traducción y otru consistente nuna esposición oral y una fase de concursu na que van valorase los méritos d'aquelles persones que pasaren la primer fase, puntuandose equí la esperiencia profesional acreditada nel desarrollu de trabayos asemeyaos a los de la plaza que se convoque fechos en cualquier alministración o nel sector priváu, neto que l'asistencia a cursos de Llingua Asturiana rellacionaos coles funciones de la plaza convocada impartíos pola Alministración Pública, la Universidá d'Uviéu o l'Academia de la Llingua Asturiana. Nel tribunal van tar l'Alcalde de Cangas del Narcea o la Conceyala de Cultura nel so nome, un representante de la Oficina de Política Llingüística, un representante de l'Academia de la Llingua Asturiana, la Coordinadora Cultural del Conceyu, un representante de los trabayadores, un representante del grupu municipal d'Izquierda Xunida y otru del Grupu Popular.