Cangas del Narcea quier poner un serviciu de normalización llingüística

Cangas del Narcea da anuncia oficial de la so intención de ser el primer conceyu del occidente en tener un serviciu de normalización propiu. La propuesta vien del Grupu Socialista, mayoritariu nel Ayuntamientu

Cangas del Narcea podría convertise nel primer conceyu del occidente en disponer de serviciu de normalización del asturianu. La Conceyala de Cultura, Mónica Díaz esplicó-yos ayeri a los integrantes de la Comisión de Cultura d'una propuesta en firme del Grupu Socialista pa la creación d'una oficina que s'encargue del desarrollu de les polítiques de promoción del idioma. Pa ello, l'Ayuntamientu cuenta con acoyese a les víes de financiación que tien la Conseyería de Cultura pa estes oficines

L'oxetivu d'esta oficina, que va contar con personal contratáu que tea en posesión del títulu académicu acreditativu de la conocencia del idioma, va ser según diz el mesmu conceyu de Cangas "el de facer normal a nivel institucional lo que ya ye normal na cai". D'alcuerdu con esti planteamientu, Cangas reconoz que "l'asturianu ye una realidá llingüística en conceyu"

El Serviciu ha mandase polo qu'apaute'l plan de Normalización del asturianu, y paralelamente a la so entrada en serviciu, la Conceyalía de Cultura va trabayar na recuperación de los nomes tradicionales de los pueblos y elementos de la toponimia local, pa lo que va llevase a Xunta de Toponimia del Principáu d'Asturies l'espediente colos topónimos del conceyu, llabor difícil nun conceyu con más de trescientos pueblos y ochocientos kilómetros cuadraos d'estensión