Cangas del Narcea celebra la so XI Sumana de las Ḷḷetras Asturianas

Comienza'l domingu y va allargase hasta'l 1 de xunu con numberoses actividaes.

Un añu más, y yá van once, Cangas del Narcea fai'l so propiu homenaxe a la nuesa lliteratura. Entama la Sumana de las Ḷḷetras Asturianas de Cangas del Narcea, qu'inclúi conciertos, esposiciones, folclor, teatru, cine y charres al rodiu del asturianu.

L'eventu que va inaugurar la Sumana ye un conciertu de Güeyos de la Montaña y un homenaxe a l'Asociación Cultural Canguesa de Canción Asturiana (ACCAN) que va tener llugar el domingu, a les 19 hores, na plaza la Oliva. El martes va entamase la IV Xunta de Escolinas ya Escolinos cola Ḷḷingua, na qu'Higiénico Papel Teatro va representar 'El viaxe de Covaletti', y el miércoles, a les 9.15 hores, el realizador Pablo A. Quirona va poner una charra a los alumnos del IES Cangas del Narcea sobre cine.

El dúu L-R va llevar la so propuesta musical a la plaza La Refierta'l xueves a les 20 hores, mentes que'l vienres la Banda de Gaitas Cangas del Narcea entama nel Teatru Toreno, a les 20 hores, un Muestra de Folclore Cangués. Pa finar la Sumana, el patiu de la Casa Conceyu va acoyer el sábadu a les 21 el III Entama la Nueite, al que se convida a tol mundu a tocar, cantar y baillar, anque pal 1 de xunu ta previstu una Nueite de Cine Asturianu dende les 22 na Escuela d'Araniegu.