Cangas convoca la novena edición del Concursu de Cuentos Curtios

El Conceyu de Cangas del Narcea ta acabante d’abrir el plazu de presentación de trabayos pa participar nel IX Concursu de Cuentos Curtios. Toles persones interesaes en concursar tienen hasta’l 21 d’avientu pa presentar les sos obres.
              
Como ye norma dende la primer edición, el concursu va tener dos categoríes, la d’asturianu occidental y la d’asturianu estándar, que van tar premiaes con 500 euros caúna. Nél pueden participar persones mayores de 16 años que presenten un trabayu inéditu de temática llibre con una estención mínima de 5 fueyes en DIN-A4, y máxima de 20, a espaciu doble. Los cuentos han d’unviase, per corréu, a la direición siguiente: Serviciu de Normalización Llingüística del Conceyu Cangas, La Plaza la Oliva s/n, 33800 Cangas del Narcea. El sobre tien qu’incluyir cuatro copies del trabayu baxo nomatu y una plica.
 
Ente toles obres recibíes, un xuráu formáu por un representante de la conceyalía de Cultura, otru de l’Academia de la Llingua Asturiana, maestros de Llingua Asturiana y escritores n’asturianu van decidir los dos ganadores. Les persones que quieran más información o plantegar dalguna dulda sobre’l concuersu pueden facelo nos teléfonos del Serviciu de Normalización (985.81.26.17/ 985.81.70.89) n’horariu de 8 a 15 hores, o nel corréu electrónicu l.linguacangas@ayto-cnarcea.es.