Cangas celebra la fiesta de San Tisu inaugurando un muséu sobre'l vinu

Cangas del Narcea celebra mañana domingu la fiesta de San Tisu. Organizada pola Cofradía del Vinu de Cangas, la fiesta va coincidir cola inauguración del Muséu Etnográficu del Vinu "Lagar de Santiso"un equipamientu cultural col que dar a conocer la tradición y evolución histórica del vinu de Cangas. Un bon garapiellu de vecinos propietarios del inmueble cediéron-y al conceyu pol plazu de 30 años les instalaciones de lo qu'agora ye muséu y que va inaugurase a les 12 de la mañana d'esti domingu

El llagar, reconstruyíu a partir de semeyes y d'una maqueta que ficiere un vecín, toma la planta del edificiu casi entera, y pasa a ser d'agora en p'alantre'l noyu cultural d'un barriu de Cangas nel qu'entovía güei esisten nueve bodegues amás del llagar comunal. El proyecto museográficu y museolóxicu quier qu'el muséu s'enxerte en redes de museos monográficos del vinu pa garantizar la meyora de la exposición y el poder facer convenios con otros centros pal intercambiu de materiales. D'otra manera quier ser tamién un muséu vivu, faciéndose rutes complementaries pa visitar les viñes

D'otra manera, l muséu del vinu de San Tisu enxértase nun ampliu proyectu de recuperación del patrimoniu de Cangas que pretende facer per tol conceyu una rede de pequeños museos monotemáticos col Palaciu d'Omaña por cabecera. Delles de les actuaciones d'esti plan yá tan en funcionamientu, como ye'l casu del Mazu de Bisuyu, mientres qu'otres, como la recuperación d'un antiguu molín d'agua reconvertíu en central eléctrica a lo último de la so vida, tan pendientes de rematase.