Candás recupera la nueche folk

El prau Gervasia de Candás vuelve a acoyer, dempués de dos años de parón, una nueche celta mañana sábadu.

Esti conciertu, organizáu pola asociación "Ensame Xuvenil Trisquel" y el "Grupu de Baille Tradicional San Félix" de Candás, llega con ésta a la so séptima edición. El trabayu d'esta xente foi quien a recuperar esti festival que dexó de facese va dos años por problemes col Conceyu, y que trai tolos años a bien de xente hasta'l conceyu de Carreño.

El llugar de la fiesta va volver a ser, como n'años anteriores, el prau Gervasia, que ta no cimero de Candás y a la vera de la mar, lo que nos da de mano un sitiu enforma guapu pa una nueche folk. Ellí, dende les 19:00 hores, va haber animación colos grupos de baille "Grupu de Baille Tradicional San Félix" de Candás que xuega en casa, y los gallegos "Follas Novas de Mos". Dempués de los bailles tradicionales, va ser el folk y rock quien tienen d'enllenar de música asturiano'l prau candasín. Los encargaos van ser los "Gatos del Fornu", acabante llegar de Lorient, nel rock tenemos el grupu formáu por xente de Candás y Lluanco, "Skama la Rede",que van tocar los más de los sos cantares recoyíos na so maqueta, "Hestories Absurdes". Volviendo a una llinia más folk topamos a los otros grupos de la nueche, "Corquiéu", y "N'Arba", que yá tan tocando nos sos directos dalgún tema del nuevu discu qu'esperen grabar pal añu que vien.

En resume, un bon plan pa la tarde y la nueche del sábadu nel conceyu de Carreño, onde la sidra va tar dende bien ceo enfriando pa que seya una vegada más un ésitu de nueche celta.