Candás, protagonista esta selmana

L'ensame Xuvenil Trisquel y el grupu de baille San Félix recuperen, xunta otres organizaciones y instituciones candasines y tres de dos años en que nun pudo facese, una de les nueches folk mas populares de la costa central asturiana y organicen xunta ella toa una selmana d'actividaes culturales centraes na mar

La esposición "La mar n'otra dómina" ye ún de los acontecimientos que s'organicen nesta selmana cultural candasina. Gracies a los fondos de lo que diba ser el Muséu de la Pesca de Candás, cedíos pol so responsable, y col trabayu de les asociaciones qu'organicen la selmana, esta esposición céntrase no que yera la vestimenta de los marineros candasinos a entamos del sieglu XX. Xurde Fernández, ún de los organizadores de la Selmana Cultural, sorraya la importancia que tien l'esponer estos traxes antiguos sobremanera pa los rapacinos, qu'asina tienen contactu directu coles condiciones de vida y de trabayu de los sos antepasaos. Otru tanto va pasar col taller "iguar les redes" que, a la manera d'un muséu vivu, va enseñar, graciesa la collaboración d'una antigua redera candasina, el trabayu de costura de les redes de pesca que va tiempu estraben les casi de la villa.

Xunta estes esposiciones, que se complementen con otres actividaes culturales como la conferencia que va poner el vienres l'investigador etnográficu Alberto Álvarez Peña, el puntu fuerte de la selmana va ser la nueche celta, que, dempués de dos años d'ausencia causaos mayormente por problemes presupuestarios, vuelve a tomar el Prau Gervasia. Pa nun facer de menos lo que s'espera d'esta nueche, el cartel ye de los meyores que se puen facer solo con grupos asturianos, axuntando nel escenariu al grupu local Skama la Rede, Corquiéu, Gatos del Fornu y N'Arba.