Candás celebra la IX edición del so Festival de Bandes de Gaites

La Banda de Gaitas A Carballeira, d'Ourense, el Bagad bretón Sant Ewan Bubry, la escocesa City of Newcastle Pipe Band, los músicos de l'Associació Xeremiers Orat de les Illes Balears y los tamién bretones Kevrenn an Arvorig & Cercle Celtique Bro ar Ster Goz son les bandes estranxeres que dende güei participen nel Festival de Bandes de Gaites de Candás, nel que faen d'anfitriones la Bandina de la Escuela de Música Tradicional de Candás y la Banda de Gaites de Candás.

La música de les gaites va entamar a sonar a les 23 hores peles cais d'esta villa marinera asturiana col gran pasucais que van protagonizar les bandes participantes y que va rematar na plaza la Baragaña, onde va siguir la música coles actuaciones de los solistes. La xornada del sábadu madruga hata les 12 hores, col Pasucais peles cais de Candás de toles bandes participantes, desfile que va repetise con recorríu del Muelle a la Plaza Les Conserveres esi mesmu día pela nueche.

La Banda Gaites de Candás, que dirixe Velu Muñiz, ye la organizadora d'esti alcuentru. Creada nel añu 1990 tien anguaño más de cuarenta músicos titulares y sobre cincuenta escolinos na so escuela de música, que s'asitia nel edificiu del faru de Candás. Campeona d'Asturies nel III Campeonatu Nacional y primera clasificada na 1ª Fase de la XIV Liga de Gallega de Bandes, la banda candasina foi la primera banda asturiana en competir nel 1° Grau de la Liga Gallega de Bandes. Con delles actuaciones nel l Intercélticu de Lorient, l'International Music Festival of
Coalisland (Irlanda), los festivales célticos Pentdragón de Trieste y Suoni delle Dolomiti d'Italia y otros de Bretaña y Portugal, la banda candasina ye tamién de le que más tienen andao pel estranxero.


L'actividá musical en candás nun apara con esti festival, y ello ye que pal mes qu'entra va celebrase la tradicional nueche folk del Prau Gervasia, organizada por colectivos xuveniles candasinos y que anque dellos años nun pudo celebrase por falta d'alcuerdu col Conceyu, tien fecha acutada pal 20 d'agostu y la presencia asegurada de dellos grupos, ente ellos Corquiéu.