Cancioneru de la Xota Asturiana

Va unes selmanes l'Andecha Folclor d'Uviéu presentó un trabayu perimportante pa los estudios etnográficos asturianos, vamos conocer más coses d'esti llibru, que yá pue mercáse na nuestra tienda n'internet.

"El Cancioneru l'Andecha, la Jota n'Asturies" ye una obra que ye frutu directu del trabayu y la investigación de campu. Tres muncho años de caleyar per Asturies recoyendo un parte de nuestra cultura tradicional, L'Andecha Folclor espubliza una parte del trabayu d'investigación y del so archivu, concretamente la parte que cinca al baille de la Xota n'Asturies.

El llibru entama con un prólogu del profesor de la Universidá d'Uviéu Javier Fernández Conde, pa siguir con un averamientu al términu Xota, ye dicir, posible orixe, estructura básica y otres cuestiones que van ayudanos a comprender meyor el restu del llibru. A partir d'ehí y hasta'l final, el llibru va centráse n'esplicar como ye esti baille n'Asturies, que característiques principales definen a la Xota n'Asturies, y pa ello vamos tener qu'averanos a la so estructura, pasos y partes. Gracies al conocimientu d'estos conceptos vamos poder ver les distines modalidaes que tenemos n'Asturies del baille de la Xota. Estes distintes formes d'echar el baille l'Andecha Folclor organizóles nuna división xeográfica en cinco zones, caún d'elles coles unes circunstancies propies que les diferencia de les otres. Nesti estudiu nun s'escaez una cuestión básica del baille, la música. Los instrumentos y la forma d'usalos pa tocar la Xota tamién tienen el so espaciu nesti estudiu d'esti baille tan estendíu non solo por Asturies si non per tol Estáu Español.

Ente les aportaciones d'esti trabayu d'investigación rescampla la última parte del mesmo. Más de cuatrocientes partitures de xotes asturianes de toles zones d'Asturies, siguiendo la división fecha de cinco zones nos capítulos anteriores. Les más de les partitures lleven tamién la percusión qu'acompaña a la melodía, y cuando son cantaes la lletra, una amuesa de la bayura del repertoriu tradicional asturianu nesti baille en concretu.

El llabor de l'Andecha nun va quedar nesti trabayu, pa l'añu qu'entra tien la intención d'espublizar un llibru de característiques similares pero sobre la muñeira, y pa más p'alantre otru sobre dances. Per agora podemos averanos a la música asturiana al traviés de la Xota con esti trabayu, y si queréis mercalu podéis facelo na nuestra tienda Asturshop.com.