Canción y poesía despiden la Xira pola Oficialidá en Mieres

Cinco díes d'actividá cultural en defensa del idioma van pesllar con un actu reivindicativu.

La Fundación Almastur y Iniciativa pol Asturianu llevaron a Mieres la Xira pola Oficialidá que ta percorriendo'l país. Ésta arrancó en Bimenes n'abril y pasó nesti tiempu per Samartín del Rei Aurelio y Villaviciosa nel so enfotu de llegar a tolos puntos d'Asturies y tamién a otros territorios de fuera.

La Casa de Cultura Teodoro Cuesta ta acoyendo toles actividaes. Asina programóse nesti centru mierenses la proyeición del documental ‘De güeles a nietes’; la charra-coloquiu ‘¿Por qué sí a la oficialidá del asturianu?' d'Inaciu Galán,; un taller de creación lliteraria baxo la dirección de Raúl Alonso, ganador del Premiu Asturies Moza de Poesía; y la intervención ‘Escritores de Mieres na lliteratura asturiana’ de Xosé Ramón Iglesias Cueva.

Güei va ponese'l ramu a la Xira pola Oficialidá a les 19.30 hores con un actu que va contar con una apertura musical de Castañón y una llectura poética de Xuan Santori, Carlos Rubiera y Galán. Tamién se va lleer el 'Manifiestu pola oficialidá' robláu polos organizadores, que cuenten nesta ocasión col sofitu del Conceyu de Mieres y de la Casa de Cultura.

Amás, entovía van poder visitase a lo llargo del día les dos esposiciones qu'acompañen a esta iniciativa: 'Voces, una hestoria de la llingua asturiana’ y una muestra de llibros básicos sobre l’asturianu qu’inclúi diccionarios, llibros de consulta y normativos, o traducciones al asturianu de grandes clásicos de la lliteratura.

Na semeya, cristalera de la Casa de Cultura Teodoro Cuesta qu'anuncia l'actividá selmanal, onde s'emplega l'asturianu con normalidá.