Campesinos de toa Europa van debatir n’Asturies sobre les polítiques agraries de la UE

Representantes de colectivos del campu de toa Europa van participar esti fin de selmana n'Asturies nun debate sobre'l mundu rural européu y les polítiques agraries de la UE, dientro d'unos alcuentros que promueve'l movimientu internacional "Vía
Campesina". El director de l'Axencia Asturiana de Cooperación al Desarrollu,
Rafael Palacios, presentó estos alcuentros acompañáu por Mario García, de Ecoloxistes n'Acción y representante de los colectivos que van participar nel alcuentru.

Más de trenta espertos europeos y bien d'organizaciones sindicales y agraries españoles, casu del sindicatu COAG, el sindicatuLabrego de Galicia, el sindicatu EHNE del País Vascu, o'l Sindicatu d'Obreros del Campu d'Andalucía. L'alcuentru tien un doble oxetivu, que pasa por meyorar la coordinación de los grupos que formen Vía Campesina, y tamién concienciar a la sociedá asturiana de los problemes y necesidaes del mundu rural.


Outur (Valdés) Llanes, Uviéu y Xixón van ser los llugares onde se desarrollen les actividaes y meses redondes d'estos alcuentros que quieren que'l públicu s'interese poles cuestiones del campu en cuantes que ye "un tema que debería preocupar a tola sociedá" porque, "tamos quedando ensin agricultores y ganaderos" según esplicó'l representante del grupu ecoloxista, que calificó'l "pieslle diariu" d'esplotaciones como "el gran problema del campu". García apuntó al desmantelamientu de la política de cuota llechera que dixo que diba ser dalgo "desastroso pa la Cornisa Cantábrica".

Vía Campesina defende una producción respetuosa colos recursos naturales y apuesta pol modelu de la pequeña y mediana esplotación agraria, siendo ún de los sos oxetivos principales el llogru de la "soberanía alimentaria" de tolos países del mundu.