Campaña contra los barcos ferruñentos

La llista de barcos potencialmente peligrosos y na llende de lo llegal que lleguen a los puertos asturianos sigue engordando cola llegada al Puertu d'Avilés del Metanol, que vieno de Gante pa embarcar 3.700 Tm de ácidu sulfúrico con destín al puertu portugués de Setubal. De bandera portuguesa y armáu en 1984, a esti quimiqueru alcontráron-y 28 fallos de seguranza nes inspecciones que se-y ficieron nel añu 2002 en dellos puertos de Francia, Holanda y España.
Esti barcu ye parte de la familia del Metilo, el Formol, l'Estireno y el Benceno, toos ellos propiedá de la empresa Química Naviera y que yá foron noticia nestes páxines.

L'apaición d'esti barcu vien a coincidir cola presentación del portal de la organización ecoloxista alemana Kust en Zee, que se dedica esclusivamente a controlar l'actividá de los barcos col cascu ferruñentu que suponen un peligru pa la navegación pero que les navieres siguen gastando pa carretar productos como'l fuel, refugalla de pocu valir que precisa d'un tresporte barato pa que la travesía salga rentable.