Cameron quier un referéndum sobre la independencia d’Escocia nel 2013

El primer ministru británicu, David Cameron, quier resolver pronto’l futuru d’Escocia, pa lo qu'ufrió un reférendum sobre la so independencia pal 2013. N'Alba, onde se falaba del 2015, considérenlo una intromisión de Londres nos sos asuntos.

L’oxetivu de Cameron con esti movimientu ye adelantase al plan previstu por Alex Salmond, primer ministru escocés que gobierna dende mayu con mayoría absoluta, pa celebralo dientro de trés años. D’esta forma, el británicu espera que salga un ‘non’ a la dixebra d’Alba nuna consulta “xusta, nidia y decisiva” y frenar a un nacionalismu escocés n’ascensu que, según les encuestes, nun para de sumar adeptos a la independencia del país. Asina, Cameron señaló nuna entrevista en Sky News que “si Alex Salmond quier un referéndum pa la independencia, ¿por qué esperar?”.

La maniobra del llíder conservador nun prestó n’Edimburgu. Los gobernantes del país acusen a Cameron d’interferir na democracia escocesa y mantienen la so intención de dotar al Parllamentu de competencies económiques importantes enantes de dar el pasu de celebrar el referéndum sobre la dixebra d’Alba, yá na segunda metá de la llexislatura.