Cambeos nel panorama eléctricu

"Ecoloxistes n'acción" albidra cambeos d'importancia nel mapa eléctricu del norte de la península. La organización ecoloxista "Ecoloxistes n'acción" espublizó esta selmana un informe nel que, ente otres conclusiones, diz que les nueves centrales que van a echar a andar nel triángulu La Rioja-Navarra-Euskadi van suponer una capacidá de producción superior al consumu que tienen anguaño estes comunidaes autónomes, que tradicionalmente importaben electricidá producío n'Asturies. Según el grupu, ello pue ser un factor decisivu a la hora de que les compañíes eléctriques decidan o non asitiar centrales térmiques nueves

D'otra manera, Ecoloxistes n'Acción camienta que l'añu 2005 va ser el primeru en que se note una baxada grande de la producción en centrales térmiques de carbón, estimación que vien de la entrada en serviciu de gran parte del parque de centrales de gas previstes que faen baxar el tantu por cientu del total que representa'l carbón. Los ecoloxistes tienen pa ellos que la baxada de producción en centrales de carbón yá tuviere de notase nel 2004, pero la xuba de la demanda y la baxada de producción hidráulica nel exerciciu acabante pasar torgaron esa posibilidá, anque según les cuentes de los conservacionistes, el record de producción con carbón del añu 2002 tien de considerase yá como dalgo del pasáu.

Ente los datos qu'apurre l'avance de datos de Rede Eléctrica (REE) col que trabayó l'asociación ecoloxista pa facer el so estudiu, rescampla'l de la potencia asitiada nel estáu, que tuvo una xuba de 3.685mw cola entrada en serviciu de 10 grupos térmicos de ciclu combináu a gas. Con ello la potencia asitiada en gas nel estáu ye agora de 8.259 MW contra 12.075 MW de les térmiques a carbón, hasta agora espinazu del mapa eléctricu español y sobremanera del asturianu.