Caixa Catalunya merca asturcones

La Fundación Territori i Paisatge de Caixa Catalunya dio anuncia ayeri de l'alquisición de seyes exemplares de caballu asturcón que va llevar a la finca que tien la entidá financiera catalana n'Alinyá (Lleida) onde La Caixa tien un centru de recuperación d'especies en peligru d'estinción. La cuadra d'asturcones de Caixa Catalunya va crecer d'equí a la vuelta de bien poco en cuantes que de los 6 exemplares cuatro son yegües y trés d'elles tan preñaes.

La Fundación Territori i Paisatge, entidá que xestiona la finca d'Alinyá onde van dir los asturconesencárgase mayormente de l'atención d'especies minoritaries y en peligru d'estinción d'aniciu mediterráneu, curiándose nes sos instalaciones d'oveyes del Val d'Arán, cabres de Rasquera y burros catalanes.

L'asturcón, del qu'esisten testimonios documentales dende'l sieglu I enantes de Cristo, ye una de les races de caballu más antigües y meyor conservaes xenéticamente. El míticu caballu de losastures foi quedando progresivamente arrequexáu a zones de monte hasta llegase a una situasción crítica nos años 70 del sieglu XX, cuando'l censu d'asturcones baxó de los 100 exemplares. Dende últimos d'esta década, l'enfotu de grupos ecoloxistes concienció a los asturianos sobre la situación d'estos animales, afalando una recuperación rápida hasta llegar a la situación actual en que munchos particulares se dediquen a la cría del asturcón, amás de la esistencia de bien d'exemplares en llibertá, un llabor nel que foi clave'l papel de l'Asociacción de Criadores de Ponis de Raza Asturcón (ACPRA). Dende va unos años, xunta l'asturcón de capa negra, la variedá mayoritaria y más protexida oficialmente, dellos especialistes reclamen atención pal asturcón de capa castaña, la variante occidental que ta en mayor peligru d'estinción.

Más información: Asociación de Criadores d'Asturcón / Fundació Territori i Paisatge