Cádiz 0 - Sporting 1

El Sporting volvió de Cádiz con trés puntos d'oru que-y valen l'afitase na tercer posición de la tabla con cuatro de ventaya sobre l'Alavés, qu'agora ye cuartu, y a namás un puntu del lideratu, que comparten el Levante y el Numancia. Los asturianos xugaron bien y superaron la influyencia del públicu gaditanu, que fai del Carranza ún de los estadios más difíciles de la categoría. Dambos equipos xugaron con un 4-4-2, lo qu'afaló que'l partíu fuere emocionante, y anque'l Sporting foi claru dominador, el Cádiz tuvo 15 minutos al entamu nos qu'afogó al Sporting nel so campu y disfrutó de delles oportunidaes más a lo llargo de la tarde, casu de la que-y paró Roberto a Oli. El ex-xugador del Real Uviéu tuvo mui trabayador tola tarde, pero ensin aciertu.

Nel conxuntu asturianu, les llegades al área rival yeren cada vegada más clares, y Bilic pudo adelantar al Sporting, pero la trasera del Cádiz llibró na mesma raya col rebatiador ya superáu. A la vuelta del descansu, el Cadiz metió a Navarrete y Mario pa da-y fuelgu al xuegu, pero'l Sporrting foi quien llevó'l mandu de les operaciones hasta llegar a un final emocionante nel que l'árbitrio pintó muncho. La segunda mariella de Suárez supunxo'l penalti que tresformó Bilic, y a poco del final De Quintana vía la encarnada directa, colo que'l Cadiz perdió cualquier opción a empatar, mientres que'l Sporting nun supo remachar. Anque l'árbitrio decidió'l resultáu, la prensa gaditana da esta mañana por xustu'l trunfu del Sporting