Cada añu piérdese una superficie de viesca del tamañu de Portugal

La organización conservacionista internacional Greenpeace denuncia esti datu nel Día Mundial de la viesca, mientres que los ecoloxistes asturianos denuncien la "amenaza mediuambiental" que supón la política forestal del executivu asturianu.


Cada 21 de marzu, coincidiendo cola entrada de la seronda nel hemisferiu sur y la de la primavera nel norte, celébrase'l Día Mundial de la viesca, una fecha en que los colectivos ecoloxistes asoleyen les sos valoraciones y estudios sobre un asuntu que ye ún de los pegoyos en que se tien la conservación del mediuambiente y de la diversidá de los ecosistemes del planeta.

Y ello ye que nesti 2005 les valoraciones que lleguen dende tolos puntos del planeta son negatives enforma. Asina ye que Greenpeace, la mayor organización internacional de defensa del mediu ambiente denuncia nesti día que cada añu la tierra sufre la desapaición d'una masa forestal d'alredor de los 89 millones d'hectárees, una superficie qu'equival a la estensión de Portugal. La organización diz que cada añu tan desapaeciendo viesques enteres mientres aumenta la producción de papel d'una manera incontrolada. Según los datos que remana Greenpeace, el 17% de la madera que consume la industria papelera nel mundu vien de lo que se conoz como "madera primario" viesca antiguo d'árboles centenarios y especies de crecimientu lentu, lo más d'ello del Canadá, Rusia y Finlandia. Pa concenciar a les persones sobre la repercusión del consumu de papel, la organización va presentar una "calculadora" que va permitir que cada particular sepa cuantu papel consume al añu y cuantos árboles supón esi gastu. Otra de les midíes de protesta de Greenpeace va consistir en facer una acampada de protesta en Finlandia nuna rexón na que'l pueblu Sami lleva los sos renos a pastiar y que ta amenazada tamién pola espansión de la industria de la madera. Greenpeace denuncia tamién que nel Canadá la empresa Kimberly-Clark, fabricante de los famosos pañuelos de papel Kleenex, ta echando abaxo grandes superficies de viesca virxe, mientres que pela contra, namás que'l 19% de la pasta de papel qu'usa esta multinacional vien del reciclao de papel, motivu que ta llevando a munches empreses, instituciones y ONG's del Canadá a facer un boicot contra esta empresa.

N'Asturies tamién hai un clima pesimista nesti día mundial, centrando los grupos conservacionistes asturianos les sos protestes na política de planificación forestal del Gobiernu asturianu. Según denuncia la Coordinadora Ecoloxista, los planes del Gobiernu asturianu pasen per una xuba de la superficie dedicao al pinu en más d'un 200% y el 17% dedicao al ocalitu, especies que tomen agora mesmo cerca de 110.000 hectárees n'Asturies contra les 200.000 qu'ocupen les especies tradicionales y autóctones asturianes, casu de les castañales, carbayos o fayes, que con ello van quedar per detrás en superficie respective a estes dos especies de crecimientu rápidu y gran aprovechamientu industrial. Al paecer de la Coordinadora ello supón un apueste pol "monocultivu" tres del que rescampla una falta visión integral del monte, con pocu o nengún respetu colos principios del desarrollu sostenible, despreciando la multifuncionalidá de los montes y en concreto'l so papel central na conservación del mediu natural. Los grupos ecoloxistes asturianos denuncien tamién qu'estes especies prenden con muncha facilidá y puen facer qu'Asturies se convierta nuna llaparada constante cada veranu, lo mesmo que pasa en Galicia, ello aparte de la gran cantidá de pistes, tornafueos y otres infraestructures precises pal aprovechamientu madereru del monte que faen d'esti plan "el más agresivu y desarrollista" d'España al paecer de la Coordinadora Ecoloxista.

D'otra manera, la xuba de superficie dedicao a ocalitos y pinos va consiguise, según espliquen los conservacionistes asturianos, a costa de grandes estensiones de matos -cerca de 300.000 hectárees- que representen un habitat amenazáu n'Asturies y qu'atechen a munches especies en peligru. Finalmente, dende'l puntu de vista del rindimientu económicu d'esti plan forestal y les sos perspectives a llargu plazu, los ecoloxistes asturianos denuncien la falta de xacíu del mesmu al ser un plan que, anque ta pensáu pa 60 años, nun parte d'un diagnósticu real del sector madereru n'Asturies, y que, al carecer de midíes reorientadores y de control, pue dexenerar en consecuencies impensables.