Cabudañu de Napster

Güei ye'l cabudañu de l'aplicación de la sentencia xudicial que llevó a la desapaición de Napster. Va xusto un añu, Napster empezó a poner filtros que torgaben la descarga de les 150.000 canciones de la llista negra que-yos mandó quitar la RIAA. Yera l'entamu de la fin del serviciu d'intercambiu de música más utilizáu na historia de la internet. Col so ésitu, Napster abrió una etapa nel intercambiu d'archivos ente usuarios al través de la rede que les discográfiques intentaron atayar como pudieron ensin ser a ello, ya que tres el trunfu del modelu de serviciu centralizáu de descargues Napster vieno una segunda xeneración de programes d'esta triba que funcionaben según el modelu
peer to peer ensin que mediare un servidor central.

Agora, dempués d'un añu, les cases de discos puen dicir que ganaron aquella batalla, pero lo cierto ye que tienen la guerra perdía. Al desapaecer Napster, una bayura de programes nuevos, qu'amás de música dexaben descargar archivos de toa triba, como vídeos y películes enteres, vinieron a ocupar el so sitiu, multiplicándose'l númberu d'usuarios y d'archivos descargaos.

Contador Estadistiques