Cabranes va celebrar el domingu’l XIII Festival de la Boroña de Forna

Una carpa asitiada nel Campu de la Capilla de la Nuesa Señora de la Sienra, en Torazu, va ser esti domingu l’epicentru del XIII Festival de la Boroña de Forna. Los visitantes tamién van poder disfrutar d’un mercáu tradicional y d’una representación teatral.
 
L’alcalde de Cabranes, Alejandro Vega, presentó güei esti festival que ye “un símbolu” pal conceyu, yá que conforma “les sos señes de identidá” a pesar de nun tar “a la moda” de la gastronomía actual. José Antonio Martínez Rozas, presidente de l’Asociación Cultural Incós de Torazu, tamién presente nel actu, eponderó’l trabayu pa la ellaboración d’esti “manxar” que s’ellabora con una masa de maíz y trigo nel que s’introduz xamón, panceta y chorizu. El procesu consiste en calentar les fornes, construyíos en piedra, onde se dexa la masa cociendo a fueu lentu per delles hores. El responsable máximu del coleutivu señaló que col festival pretende “llevar más allá del conceyu” esti alimentu propiu de la zona de Torazu que los sos habitantes tienen mui presente “allá onde vayamos”, faciendo referencia al caraúter migratorio de la xente del pueblu.
 
L’actividá del XIII Festival de la Boroña de Forna va principiar a les 11 hores cola apertura d’un mercáu tradicional d’artesanía y productos agroalimentarios y al meudía va haber un pasucais con Los Yerbatos y el Corriellu La Pandorga. Pa les 13.30 hores ta previsto’l repartu de les raciones de boroñes o parrillada, menú de 18 euros que se completa con arroz con lleche de postre. Yá de tarde, la compañía teatral Ensin Reparu va representar una obra costumista asturiana a les 16.30 hores.