Cabranes entama un ciclu de conferencies en Santolaya sobre la figura de María Josefa Canellada

La Casa Cultura ‘María Josefa Canellada’, en Santolaya, acueye un ciclu de conferencies dientro de los actos de celebración del centenariu del nacimientu de la escritora. El Seminariu de Filoloxía Asturiana collabora cola iniciativa.

Les charres, que s’agrupen baxo’l nome ‘Al rodiu de Canellada’, van desendolcase a lo llargo del mes d’ochobre en trés xornaes distintes, siempre a les 19.30 hores. La primera ta prevista pa esti vienres col títulu de ‘María Xosefa Canellada: investigación y compromisu’ y va correr a cargu de Xulio Viejo Fernández, profesor de la Universidá d’Uviéu y miembru del Seminariu. Pal vienres siguiente, día 26, va garrar el testigu Ramón d’Andrés, tamién profesor universitariu y miembru del Seminariu, que va esponer ‘Lo que pensaba María Xosefa Canellada de la normalización del asturianu’, mentes que la xornada cabera d’esti ciclu de conferencies va tratar sobre la ‘Obra lliteraria de María Xosefa Canellada: la ética nel canon lliterariu’. Ésta va tener llugar el miércoles 31 y nella va participar Pilar Fernández, profesora del IES Pérez de Ayala d’Uviéu.

Finada en Madrid nel añu 1995, Canellada escribió a lo llargo de la so vida delles obres lliteraries, como ‘Montesín’, dedicación que compaxinó cola so profesión de filóloga, siendo académica de l’ALLA dende la so fundación y de la RAE dende’l 1986. Ente los sos estudios destaca ‘El bable de Cabranes’, dedicáu a la fala d’un conceyu qu’agora quier homenaxear el centenariu del so nacimientu con una serie d’actividades ente les que s’alcuentra esti ciclu de conferencies nes que tamién collaboren la Mancomunidá de La Sidra, el Gobiernu y Caxastur.