Cúmplense 207 años de la proclamación de soberanía de la Xunta Xeneral d’Asturies

|

El 25 de mayu del 1808, la Xunta Xeneral proclamóse soberana rebelándose contra les tropes franceses de Napoleón qu’invadieren el país. La coincidencia d’esta fecha tan significativa pa la nuesa historia cola resaca eleutoral condénala a un escaezu entovía mayor que n’años anteriores por parte de les instituciones.

La declaración de soberanía de la Xunta Xeneral llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

La iniciativa #LluchandoPolaSoberanía entama una concentración n’Uviéu “pa nun escaecer, salir a la cai y defender, 207 años depués del llevantamientu del 1808, la soberanía popular asturiana pa camudalo too”. La cita ye a les 19.30 hores frente a la Xunta Xeneral y celébrase tres la decisión de la Xunta Eleutoral, Delegación del Gobiernu estatal y Policía de prohibir la del añu pasáu por coincidir coles eleiciones europees. Nesta ocasión failo cola xornada posterior a les Nacionales y municipales, lo que contribúi a un escaezu mayor pa esta celebración por parte de les instituciones y lleva a la sociedá civil a sacala a la cai.

Coincidiendo con esta fecha histórica pal país, Asturies.com recupera un artículu d’Alicia Laspra Rodríguez na revista 'Asturies. Memoria encesa d'un país', de la Fundación Belenos, sobre les rellaciones d’Asturies y Inglaterra demientres la Guerra d’Independencia.

Contador Estadistiques