Cándido avisa de “la necesidá de recuperar la xunidá pa facer frente a la represión por parte del Gobiernu”

La Sociedá Cultural Xixonesa entama esti xueves una mesa redonda sobre la esperiencia de la Plataforma contra la Represión y poles Llibertaes. Nella va participar Cándido González Carnero, que ve necesario “recuperar la xunidá”.

Esti actu, baxo’l títulu La esperiencia hestórica de la Plataforma contra la Represión y poles Llibertaes y la necesidá de la Unidá d'Acción equí y agora', va celebrase a les 19.30 hores nos llocales de la Sociedá Cultural Xixonesa (cai Miranda 4, Xixón) y tamién va contar cola participación de María Jesús Suárez García, Miguel Ángel Llana y Javier Cubero de Vicente. “Na charra va repasase la trayeutoria de la Plataforma dende que se fundó” cuando les movilizaciones de Naval Xixón, esplica Cándido, que recuerda’l marco de xunidá importante que se vivió nesos años alredor d’esti coleutivu qu’axuntaba a sindicatos, partíos políticos, asociaciones, xente de la cultura… “Una xunidá namai comparable a la de los tiempos de la dictadura y la Transición”, apunta.

La coxuntura actual ye diferente enforma, pero la represión ta otra vuelta d’actualidá, “con 120 imputaos de les protestes de la minería, la fuelga del 14 de payares y otros sectores en llucha, a los que se-yos piden penes de prisión y multes económiques cuantioses”. Esta situación llevó a, finales del añu pasáu, a reactivar la Plataforma contra la Represión y poles Llibertaes, anque la xunidá del 2007 y años posteriores paez que nun ye la mesma. “Ye necesario recuperar la esa xunidá que se vivió ente’l 2007 y el 2010 pa facer frente a la represión por parte del Gobiernu, una xunidá qu’agora nun hai”, alerta Cándido, que recuerda los grandes llogros que se vivieron naquellos años, coles muestres de solidaridá importantes cuando l’encarcelamientu del propiu sindicalista y del so compañeru Juan Manuel Martínez Morala, y la so amplia repercusión en medios nacionales y estatales.