Busto y Villaverde presenten la Revista de Filoloxía Asturiana

Dende primeros d'esti veranu ta nes llibreríes el primer númberu de la Revista de Filoloxía Asturiana. Esta revista, dirixida por Juan Carlos Villaverde Amieva
y Xuan Busto Cortina,

especialízase n'estudios llingüísticos y lliterarios de la llingua
asturiana, enllenando un furacu nel panorama d'estudios. Esti primer númberu, que llega a les 248 páxines, espubliza los estudios Léxico asturiano en un tratado de granjería del año 1711, de Juaco López Álvarez y Raquel Suárez García, Metafonía y contrametafonía en quirosán: pragmática, determín léxicu y morfosintaxis, de Xulio Viejo Fernández, Una cala en el léxico leonés, de Janick Le Men Loyer,
y Aspectos diacrónicos e sincrónicos do galego de Asturias, de Antón Xosé Meilán García. Nes estayes de notes y reseñes alcuéntrense tamién collaboraciones más curties como Aumentativos para lo inaccesible. Reacciones de una lengua rural ante la tecnología industrial, de Luis Martínez Lorenzo, artículos sobre la Colección diplomática del Monesteriu de San Xuan Bautista de Courias y curiosidaes como Una carta en llingua asturiana de Menéndez Pidal a Leite de Vasconcelos.La comercialización d'esta revista nun ye la convencional. Pa poder mercala fai falta soscribise a ella unviando recáu a Ediciones Trabe. La soscripción val 22 euros (1 exemplar al añu). Como esti primer númberu salió con retrasu y yera'l correspondiente al 2001, el númberu 2 ta preparándose yá pa que salga pa esta seronda.