Bush ganó la reelección

La primer potencia mundial votó por repetir gobiernu. Bush y el Partíu Republicanu ganaron con más diferencia que va cuatro años y amás cola xustificación que da una participación histórica de más del 60%

Anque entovía quedaba por finar el recuentu nel estáu d'Ohio, que podía entornar la votación, el candidatu demócrata John Kerry reconocía ayeri que perdiere les elecciones y llamaba pa felicitar a Bush. Remataba asina, ensín la polémica del 2000, el drama mediáticu que son tradicionalmente les elecciones presidenciales nos USA, y facíalo amás con un trunfu claru de George Bush y el Partíu Republicanu, que reforciaba la so representación nel senáu de Washington. Una participación histórica de más del 60% nunes elecciones nes que tradicionalmente nunca nun voten más del 50% de los ciudadanos roblaba, con más autoridá, el trunfu del candidatu republicanu, que cuntó col sofitu de l'América fonda: tolos estaos del centru y el sur de los EEUU votaron mayoritariamente a Bush, mientres que los sofitos del derrotáu John Kerry repartiéronse mayormente peles dos costes y pel norte.

Dende'l llau del vencedor, Bush dio un discursu d'agradecimientu estráu de referencies a les esencies de la patria, con guiñada a Texas incluyida y dio anuncia del entamu d'una llexislatura "d'esperanza" na que diba meyorar los sistemes de seguridá social y facer más escueles" y na que sorrayó que diba siguir apoyando a les "democracies n'espoxigue" d'Iraq y l'Afganistán". Bush emponderó'l camín d'estos cuatro años y reconoció en referencia a los atentaos del 2001 y los ataques a Afganistán y Iraq que "El nuestru exércitu llevó la xusticia al enemigu y honor a América. La nuestra nación defendióse de los sos enemigos y llevó la llibertá a tola humanidá". Entovía más, según Bush "nun hai tope pa la grandeza d'América".

Pela parte de los derrotaos, Kerry llambió nel so discursu les mancadures del trastazu electoral agradeciendo-yos el llabor a tolos que lu sofitaron nesta campaña y emponderó les virtúes de la democracia americana, reconociendo'l trunfu de Bush. D'otra manera, nel barcu de Kerry diben tamién bien d'artistes y personaxes famosos que lu sofitaron mediáticamente como poques vegaes se viere na historia. Col electoráu polarizáu dafechu, cantantes como Bruce Springsteen o Michael Stipe ficieron campaña por Kerry, lo mesmo que'l polémicu director de cine Michael Moore, que güei abre la so web enseñando un retratu de Bush fechu con semeyes de soldaos americanos muertos. Sicasí, l'encontu más influyente que tuvo Kerry nesta campaña foi'l del multimillonariu George Soros. El responsable del surdimientu y fundimientu d'economíes enteres y amu de la especulación en bolsa punxo bien de perres pa la campaña de Kerry y amás espublizó tribunes y artículos esplicando que Bush yera "un peligru pa la economía mundial". Tres de la derrota, Soros diz qu'espera que Bush deprenda de los sos errores

La votación con más participación n'años foi tamién la más cara de la historia. Los dos candidatos gastaron millones a espuertes, y agora habrá que ver como los sos patrocinadores obliguen a Bush a devolvé-yos favores y perres emprestaes. Ente los que más punxeron pa la campaña de Bush ta Microsoft, anque la empresa de Bill Gates, al revés que Soros, fizo lo que suelen facer les más de les corporaciones en campaña, ello ye, encomendase a Dios y al Demoniu y poner perres pa los dos candidatos.

Pa más información:

Medios americanos: CNN The NewYork Times USA Today Los Angeles Times
Washington Post
Prensa europeo: Guardian (UK) La Reppublica (Italia) Liberation (Francia) El Mundo (España)