Bush aprueba la invasión d’Irak y xustifica les tortures

L'últimu presidente d'Estaos Uníos, George W. Bush, opinó que la decisión d'atacar nel 2003 al réxime de Sadam Husein "nun foi un error" y que l'usu de ciertes técniques illegales d'interrogatoriu "salvó vides".

Sicasí, dixo que quedó "sorprendíu y rabiáu" cuando les fuerces norteamericanes nun alcontraron les armes de destrucción masiva n'Irak y qu'hasta se sintió "mal del estómagu" cuando-y informaron de les tortures nel centru de detención iraquín d'Abu Ghraib.

Na entrevista grabada que va emitir esti martes la cadena de televisión NBC, la primera dende que dexó la Presidencia d'Estaos Uníos, George W. Bush declaró que los dos grandes "errores personales" del so mandatu fueron la xestión de los desastres causaos pol huracán 'Katrina' en Nueva Orleans y el discursu de Misión Cumplida' que pronunció a bordu del portaaviones 'USS Abraham Lincoln', al cabu de la primer fase de la invasión de Irak.
     
Nel so llibru de memories, 'Decision Points' (de próxima publicación), Bush almite los errores del so Gobiernu en relación coles armes de destrucción masiva d'Irak, principal 'casus belli' de la intervención del 2003. "Naide quedó más sorprendíu y rabiáu que yo cuando nun atopamos les armes. Tenía sensación d'ascu cada vez que pensaba nello, y sigo teniéndola", declaró na entrevista.
  
Refuga a pedir perdón
Sicasí, l'ex mandatariu refugó la posibilidá de "pidir perdón" al pueblu estaounidense porque "pidir perdón implica, básicamente, que foi una decisión errónea". "Yo nun creo que fuere una decisión errónea", añadió. "El mundu ta meyor sin Sadam Husein nel poder", comentó.
  
Coles mesmes, l'ex presidente aseguró que se sintió "mal del estómagu" cuando-y llegaron nel 2004 les imaxes sobre tortures per parte de los soldaos estaounidenses nel centru de detención iraquina d'Abu Ghraib. "Nun sólo maltrataron a los presos, tamién avergoñaron al Exércitu d'Estaos  Uníos y engocharon el nuesu bon nome", aseguró.
  
Tortura pa “salvar vides”
Sicasí, nel so llibru de memories, Bush xustifica l'usu de técniques illegales d'interrogatoriu, como l'afogamientu simuláu ('el submarín'), pa obligar a los presuntos terroristes a informar sobre posibles ataques. "L'usu d'eses técniques salvó vides", declaró Bush na entrevista. "El mio llabor consistía en protexer a Estaos Uníos, y asina lo fice".