Bual va celebrar dende’l vienres la cuarta edición del so Outono Cultural

Per cuartu añu consecutivu, Bual va disfrutar de trés díes de música, arte y lliteratura. Esti vienres torna l’Outono Cultural, actividá entamada pola Asociación Xuvenil Mezá cola fin de dinamizar la vida cultural del conceyu.
 
La inauguración del IV Outono Cultural va tener llugar a les 20 hores na Casa de Cultura –onde van celebrase toles actividades–con un actu nel que va tar presente l’alcalde, José Antonio Barrientos. Darréu, va celebrase un conciertu del duu gallegu Espido, formáu por Guadi Galego y por Guillerme Fernández –músicos que yá tocaren xuntos en Berrogüeto–, que s’averen a Asturies “pra dar a conocer el sou xeito d’entender a tradición atlántica, a música d’autor y el jazz”, según informen dende la organización.
 
El sábadu va concentrar la mayor parte d’esta iniciativa tamién enfotada na promoción del asturianu y gallegu-asturianu. Asina, al meudía, va presentase la obra ‘L’alma robada’ (Ámbitu, 2011), de Pablo Texón, y la esposición ‘Desaprendizaje’, d’Esteban Suárez, que va tar abierta al públicu mentes duren les xornaes. Yá pela tarde, a les 18 hores, l’escritor Xuan Bello va moderar una mesa redonda baxo’l títulu de ‘Prensa: llibertá y represión’, que va tener una participación de primera: Xuan Cándano, direutor de la revista Atlántica XXII; Martxelo Otamendi, ex direutor del diariu vascu Egunkaria; y Óscar Vega, presidente del Comité d'Empresa de la RTPA.
 
A les 20 hores van continuar les actividades con un conciertu de Txetxu Altube, cantante de los madrilanos Los Madison, que va presentar el discu ‘Compás de espera’. Mentes, a la medianueche, va celebrase una timba poética cola participación de Pablo X. Suárez, Sergio S. Taboada, Ana Vega, Laura Marcos y Pablo Texón. Pa terminar l’Outono Cultural, que tamién se vive nestes trés xornaes nes cais de Bual, el domingu va celebrase una escursión al meudía polos restos arqueolóxicos del valle del Navia xunto col historiador Fernando Rodríguez Cueto, que va facer de guía. Esta actividá, como toles de les xornaes, ye de baldre.