Bruxeles propón recortar un 0,4% el sueldu de los eurofuncionarios

La Comisión Europea propunxo recortar un 0,4% el sueldu de los eurofuncionarios nel 2011, una reducción 12 veces inferior a la que'l Gobiernu español aplicó a los funcionarios (5%). Los sueldos d'eurofuncionarios lleguen a los 16.000 euros.

Los sueldos del Executivu comunitariu tán ente los 2.300 euros al mes que cobra un funcionariu recién contratáu de categoría 1 (la más baxa) y los 16.000 euros al mes que recibe un funcionariu de la máxima categoría (16) con cuatro años d'antigüedá.
  
L'axuste del 0,4% calculóse teniendo en cuenta la evolución nel últimu añu de los sueldos n'ocho Estaos miembros (amás d'España, Alemaña, Francia, Reinu Uníu, Italia, Países Baxos, Bélxica y Luxemburgo), que representen el 76% del PIB de la UE; y un índiz que calcula'l costu de la vida pa funcionarios internacionales en Bruxeles. La propuesta tien que ratificase tovía nos Estaos miembros  antes qu'acabe l'añu.
  
L'Executivu comunitariu caltién qu'esti axuste va tornar nuna reducción del 2,8% del poder adquisitivu de los funcionarios de la UE esti añu (dao qu'al recorte retayu del 0,4% hai que sumar un aumentu del 2,4% del costu de la vida en Bruxeles). La cayida va ser del 12,2% n'Italia y del 5% n'Italia. Nel periodu 2004-2010, el poder adquisitivu de los eurofuncionarios cayó un 6%, según Bruxeles.
  
La Comisión asegura que les normes vixentes son automátiques y nun dexen marxe de maniobra pa proponer un recorte distintu. L'añu pasáu, la so propuesta d'aumentar el xornal de los eurofuncionarios un 3,7% en plena crisis económica causó una fuerte polémica y a lo último los Ventisiete reduxeron la subida a la metá (1,85%).
  
L'Executivu comunitariu denunció esta corrección ante'l Tribunal de Xusticia de la Unión Europea por considerar que los Gobiernos vulneraron l'Estatutu de los funcionarios, onde s'inclúi'l métodu de cálculu. La vista va celebrase a últimos d'ochobre y Bruxeles yá presupuestó pal 2011 marxe abondo na partida de xornales pa pagar a los funcionarios la diferencia si gana'l casu.
  
La Comisión defende que'l métodu de cálculu de los sueldos de los funcionarios ye "eficaz" y "xustu pal personal y el contribuyente européu", al vincular l'axuste salarial nes instituciones de la UE al poder adquisitivu de los funcionarios nacionales. Amás, evita axustar añalmente los xornales.
  
Sicasí, el mesmu Executivu almite que "esiste siempre un desfase d'un añu" que provocó que nel 2010 los xornales de los eurofuncionarios siguieren subiendo pese a los recortes aplicaos a los sos colegues de les alministraciones nacionales.